سەرۆکوەزیران بارزانی: لە ڕێگەی پڕۆژەی جۆراوجۆرەوە گەشە بە هەڵەبجە دەدەین

ئاڤا نیوز

 

سەرۆکوەزیران بارزانی ڕایدەگەیێنێت، لە ڕێگەی پڕۆژەی جۆراوجۆرەوە گەشە بە ئابووری پارێزگای هەڵەبجە دەدەن، بەڵێن بە خەڵکی پارێزگاکە دەدات ئەوەی لەدەستیان بێت درێغی ناکەن. 

 

وێنە گەورەکە: ئەمڕۆ یەکشەممە سەرۆکوەزیران مەسرور بارزانی بۆ دانانی بەردی بناغەی سایلۆی هەڵەبجە سەردانی پارێزگاکەی کرد و گوتارێکی پێشکەش کرد. ئەمە دووەم سەردانی سەرۆکوەزیرانە بۆ پارێزگاکە لە چوار مانگی ڕابردوودا.

لێدوانی فەرمی: سەرۆکوەزیران باسی پرۆژەی سایلۆی کرد و  بەپێویستی زانی لە کاتی خۆی کە 700 ڕۆژە، بەپێی مەرج و پێوەرە نێودەوڵەتییەکان جێبەجێ بکرێت و بخرێتە خزمەتی خەڵک و جووتیارانی دەڤەرەکە.

 

بابەتی ستراتیژی: بە ئاماژەکردن بەوەی زیاتر لە 10 ساڵ دەبێت بڕیاری بەپارێزگابوونی هەڵەبجە دراوە، بەڵام تائێستا ڕێکارەکانی لەلایەن ئەنجوومەنی نوێنەران و حكومەتی فیدڕاڵ تەواونەکراون، سەرۆکوەزیران گوتی"پێویستە هەرچی زووە ڕێکارەکان تەواو بکرێن و بە فەرمی وەک پارێزگا مامەڵەی لەگەڵ بکرێت و بودجەی پەرەپێدانی بۆ تەرخان بکرێت، لەم ڕووەوە ئێمە لە پەیوەندی بەردەوامداین لەگەڵ لایەنە پەیوەندیدارەکان بۆ ئەوەی بەزووترین کات ڕێکارەکان تەواو بکرێن".

 

لەلایەکی دیکەوە:  سەرۆکوەزیران بارزانی باسی قەرەبووکردنەوەی خەڵکی پارێزگاکەیشی کرد و جەختی کردەوە، هەوڵەكانیان بۆ ئەم بوارە چڕدەكەنەوە و پێویستە گشت لایەنە سیاسییەكانی هەرێمیش لە بەغدا هاودەنگ و هاوهەڵوێست بن لەم بوارەدا.