قەبارەی بازرگانیی هەرێمی کوردستان و نەمسا زیاد دەکرێت

ئاڤا نیوز

 

ئاستی بازرگانی نێوان هەرێمی کوردستان و نەمسا بەرەوپێشچوونی بەخۆیەوە بینیوە و بەشێکی بازرگانی ئەو وڵاتە لەگەڵ عێراق لەڕێگەی هەرێمی کوردستانەوەیە.

 

وێنە گەورەکە: مانگی تەممووزی ساڵی 2023 ئەلیکسەندەر شالنبێرگ، وەزیری دەرەوەی نەمسا سەردانی هەرێمی کوردستانی کرد، کەمێک پێش ئێستاش بە ئامانجی ڕەخساندنی ده‌رفه‌ت و بواره‌كانی بره‌ودان به‌ په‌یوه‌ندییه‌كانی نه‌مسا له‌گه‌ڵ عێراق و هه‌رێمی كوردستان و فراوانكردنی هاریكاریی هاوبه‌ش، نێچیرڤانی بارزانی، سەرۆکی هەرێمی کوردستان گەیشتە نەمسا و سبەی لەگەڵ سەرۆکی ئەو وڵاتە کۆدەبێتەوە.

 

لێدوانی فەرمی: گەیلان حاجی سەعید، سەرۆکی ژووری بازرگانی و پیشەسازیی هەولێر بە ئاڤا نیوز گوت: ئێستا 15 بەرهەمی جۆراوجۆری نەمسا لە هەرێمی کوردستان پشتیان پێدەبەسرێت و پتەوی پەیوەندییەکان دەرگای زیاتر بەڕووی بازرگانیی هاوبەش دەکاتەوە.

 

 

ئەوەی پێویستە بیزانیت: ئەو بەرهەم و کەرستانەی لە هەرێمی کوردستان بەکاردێن ئەوانەن:

ــ پڕۆژەی ئاودانی پرژێنەر ساڵی 1979 هێنرایە کوردستان، کە سوودی لێوەرگیراوە لە دەیان پڕۆژەی کشتوکاڵی.

ــ هێڵی ئاسمانی نەمسا گەشتی هەیە لە نێوان هەولێر و ڤیەننا 
ــ تیلیفریکەکانی کۆمپانیان (دۆپێل مایازدیلبان)ی نەمسایی لە چیای کۆڕەک.
ـ کارگەی دروستکردنی شەربەتی ( ڕاوخ) لە هەولێر.
ــ ئیکسسواراتی (فرەی وڵ)ی نەمسایی
ــ ماتۆڕی پێشبرکێی گرانبەها کە بەرهەمی کۆمپانیای KTM ـە.
ــ قاوەی جۆلیۆس ماینل کە نەمساییە.
ـ ئۆتۆمبێلی ئاگرکوژێنەوەی نەمسایی لە فڕۆکەخانە و پاڵاوگەکان بەکاردێت.
ـ کۆمپانیای مۆندی نەمسایی بە هاوبەشی کۆمپانیای نێوخۆ کیسی چیمەنتۆ بەرهەم دەهێنێت.
ــ ئایس کۆفی و ساردەمەنی نەمسایی خواستی لەسەرە.
ـ بەرهەمی کۆمپانیای نیگلۆ بۆ کارەباییات.
ـ  بەرهەمی سەماعەی منداڵانی کۆمپانیای نیگلو.
ــ خواردنەی وزەبەخشی (ڕێد بۆڵ)ی نەمسایی.
ـ ئێکسسواراتی سڤارۆڤسکی نەمسایی.
ـ مەوادی تاقیگەی کوالێتی کۆنتڕۆل سەرجەمیان نەمسایین.