پڕۆژەیاسای نەوت و گاز یەکێکە لە کێشە هەڵپەسێردراوەکانی هەولێر و بەغدا

ئاڤا نیوز

پڕۆژەیاسای نەوت و گاز یەکێک لە کێشە هەڵپەسێردراوەکانی نێوان هەولێر و بەغدایە کە تاوەکو ئێستا بەبێ چارەسەر ماوەتەوە، ئەمەش هۆکار بووە لەوەی ساڵێک و چوار مانگە هەناردەی نەوتی هەرێمی کوردستان لەڕێگەی بەندەری جەیهانی تورکیاوە بوەستێت.

وێنە گەورەکە: پڕۆژەیاساکە بۆ ڕێکخستنەوەی کەرتی نەوت و گازە لە عێراق و بە یەکێک لە گرنگترین پڕۆژەیاساکان دادەنرێت. هەرێمی کوردستان و پارێزگاکانی دیکەش ڕۆڵیان لە داڕشتنی سیاسەتی نیشتمانیی کەرتی وزە دەبێت. ئەم پرسە بەشێک دەبێت لە ئەجێندای سەردانەکەی سەرۆک بارزانی بۆ بەغدا.

لێدوانی فەرمی: سەباح سوبحی، ئەندامی لیژنەی نەوت و گاز لە پەرلەمانی عێراق بە ئاڤا نیوزی ڕاگەیاند: "پڕۆژەیاسای نەوت و گاز کە (کارگێڕی و پیشەیین) ناکۆکییان لەسەرە، لە ڕەشنووسە نوێیەکەدا زۆر لە دەسەڵاتەکانی دەرهێنان و بەرهەمهێنان و فرۆشتن ناوەندی دەبن، هەرێمی کوردستان و پارێزگاکانی دیکەش ڕۆڵیان لە داڕشتنی سیاسەتی نیشتمانیی کەرتی وزە دەبێت."

خاڵە ئەرێنییەکان: پڕۆژەیاساکە تێکەڵەیەکە لە ڕەشنووسەکانی ساڵانی 2005، 2007 و 2011، بڕیارە کەرتی نەوت و گاز لە عێراق ڕێک بخات، چونکە یەکێکە لە گرنگترین یاساکان.

بۆچی گرنگە: یاسای نەوت و گاز کێشەکانی نێوان هەولێر و بەغدا لەبارەی دەرهێنان و گواستنەوە و هەناردەکردنی نەوت چارەسەر دەکات، بەتایبەت کە ساڵی 2022 دادگای باڵای فیدراڵیی عێراق یاسای نەوت و گازی هەرێمی کوردستانی هەڵوەشاندەوە.