عەتا سەراوی بە تۆمەتی "تیرۆر" دەستگیر دەکرێت

ئاڤا نیوز

 

هێزێکی سەر بە ئاسایشی یەكێتی لە فڕۆکەخانەی سلێمانی عەتا سەراوی، سەركردەی پێشووی یەكێتی دەستگیر دەکەن و لە بەرامبەریشدا سەراوی پەیامێكی تووند ئاراستەی سەرۆکی حیزبەکە دەكات.

 

وێنە گەورەکە: بەرەبەیانیی ئەمڕۆ هەینی 5-7-2024 عەتا سەراوی، دوای گەڕانەوەی لە سوێد، لە فڕۆكەخانەی سلێمانی لەلایەن هێزێكی ئاسایشی یەكێتییەوە دەستگیر كرا.

 

زانیاریی بەدەستهاتوو: میدیای فەرمیی یەکێتی هۆکاری دەستگیرکردنی عەتا سەراوی، فەرماندەی سەربازیی ئەو حیزبە ئاشکرا دەکات و ڕایگەیاندووە، بە بڕیاری دادوەر بە ماددەی 2ـی تیرۆر دەستگیرکراوە.

 

چیرۆکە سەرەکییەکە: ڕۆژی 19-4-2024 لە گەڕەکی شەهیدانی سەرچنار، ئۆتۆمبێلێک تەقییەوە بێ ئەوەی هیچ زیانێکی گیانی هەبێت، دوای لێکۆڵینەوە دەرکەوت ئۆتۆمبێلەکە هی عەتا سەراوییە.

 

بۆچوونی لایەنی بەرامبەر: دوای دەستگیرکردنەکەی عەتا سەراوی لە ڕوونکردنەوەیەکدا دەڵێت: داوای ڕوونكردنەوە لە "بافڵ و قوباد تاڵەبانی دەكەم، من ئامادەی ڕووبەڕووبوونەوەی ھەر تۆمەتێکی داتاشراو دەبمەوە کە بۆم حازر کراوە و بۆم دادەتاشن، تکایە ئەوە ئێمە و ئەوەش ئێوە و ئەو ئەڵقە لەگوێیانەی لە پشتی ئێوە پەلاماری ئێمە دەدەن".

 

زانیاریی زیاتر: سەراوی ئەوەشی گوتوە، تكایە ئەمە ڕانەگرن، کێ لەپشت ئەم بێڕێزییە بێ، بێ باج نابێ لێی دەربچێت، دەشمەوێ بزانم ئەگەر بڕیارێکی سیاسیتان لەپشت ئەم شانۆگەرییەتانە، دڵنیا بن پلاندانەر خۆی دەسووتێنێت.