سێ هۆکار لە پشت دابەزینی بەهای دیناری عێراقییە لە بەرامبەر دۆلاری ئەمریکی

ئاڤا نیوز

جارێکی دیکە بەهای دیناری عێراقی بەرامبەر دۆلاری ئەمریکی ئاراستەی دابەزینی وەرگرتەوە، شارەزایەكی داراییش بۆ چەند هۆكارێكی دەگەڕێنێتەوە.

وێنە گەورەكە: لە دەستپێکی ئەم مانگەوە، بەهای 100 دۆلار بە 147 هەزار دینار مامەڵەی پێوەدەکرا، بەڵام لە مامەڵەکانی ئەمڕۆ بەهای 100 دۆلار گەیشتە 149 هەزار دینار. ئەوەش تاڕاددەیەک پشێوی لە بازاڕەكان دروستکردووە.

لێدوانی فەرمی: جەبار گۆران، گوتەبێژی بازاڕی ئاڵوگۆڕی دراو لە سلێمانی كە هاوكات پسپۆڕی كارگێڕی داراییە، بۆ ئاڤا نیوز گوتی: یەکێک لە هۆکارەکان ئەوەیە پێدانی حەواڵەکان بۆ چین بە هۆی رێوشوێنەکانەوە درەنگ دەکەوت، هۆکارێکی دیکە ئەوەیە بانکی ناوەندیی عێراق لە ساڵی رابردووەوە رایگەیاندبوو بەشێک لە بازرگانییە نێودەوڵەتییەکان بە دراوی دیکە لە بری دۆلار ئەنجامبدرێت، بەڵام تاوەکو ئێستا لەو هەنگاوە سەرکەوتوو نەبووە.  

زانیاریی زیاتر: هیچ مەترسییەک لەسەر بەهای دینار نییە، تەنیا یەک هۆکار وەک فاکتەری جووڵەی دینار ماوە ئەویش مەترسی پەلکێشکردنی گرووپە چەکدارەکانی عێراقە لە شەڕی فەلەستین و لوبنان بەرامبەر ئیسرائیل، یاخود شەڕەکە لە ناوچەکە فراوانتر بێت.

ئەوەی پێشبینی دەكرێت: ئەگەر دۆخەکە بەو شێوەیە بێت و شەڕ لە ناوچەکە فراوانتر نەبێت، بەهای دیناری عێراقی جارێکی دیکە لەبەرامبەر دۆلاری ئەمریکی بەرزدەبێتەوە. جەبار گۆران وای گوت.