عێراق لەبارەی پارە بلۆککراوەکانی ئێران لە وڵاتەکەی داوایەک لە ئەمریکا دەکات

ئاڤا نیوز

 

وەزیری دەرەوەی عێراق جەخت لەسەر پێویستی دۆزینەوەی چارەسەرێکی خێرا و دادپەروەرانە بۆ کێشەی پارە بلۆککراوەکانی ئێران لە عێراق لە ئەمریکا دەکات.

 

بۆچی گرنگە: بەپێی گوتەی بەرپرسانی ژووری بازرگانیی عێراق، ئێران بڕی 11 ملیار دۆلار پارەی بلۆککراوی لە عێراق هەیە، بەهۆی گەمارۆکانی ئەمریکا بۆسەر ئێران، عێراق دەبێت بە دینار پارەی ئەو کارەبا و گازە سرووشتییە بدات کە لە ئێرانەوە هاوردەی دەکات.

 

وێنە گەورەکە:  فوئاد حوسێن، وەزیری دەرەوەی عێراق لە واشنتن لەگەڵ جۆن باس، جێگری وەزیری دەرەوەی ئەمریکا بۆ کاروباری ئیداری و سیاسی کۆبووەوە و تاوتوێی ژمارەیەک پرسی گرنگی دوولایەنە و هەرێمیان کرد.

 

ڕاگەیێنراوی فەرمی: وەزارەتی دەرەوەی عێراق ڕایگەیاند: لە دیدادەکە جەخت لە گرنگی پتەوکردنی پەیوەندییەکانی نێوان ئەمریکا و عێراق لە بوارە جۆراوجۆرەکاندا کراوەتەوە، "خواستی هاوبەش بۆ فراوانکردنی هاوکاری سیاسی و ئابووری نێوان هەردوو وڵات" پێشاندراوە.

 

زانیاریی زیاتر: جەخت لە پێویستی دۆزینەوەی چارەسەرێکی خێرا و دادپەروەرانە بۆ پارە بلۆککراوەکانی ئێران لە عێراق کرایەوە کە خزمەت بە بەرژەوەندییەکانی هەردوولا بکات و سەقامگیری دارایی لە ناوچەکەدا باشتر بکات.