فوئاد حسێن: لەبارەی سزادانی بانکە عێراقییەکانەوە گفتوگۆمان لەگەڵ ئەمریکا کرد

ئاڤا نیوز

فوئاد حسێن، وەزیری دەرەوەی عێراق ڕایگەیاند لەگەڵ وەزیری دەرەوە و بەرگریی ئەمریكا كۆبووەتەوە و لەسەر سزادانی چەند بانكێكی عێراقی گفتوگۆیان كردووە.

وێنە گەورەکە: فوئاد حوسێن، وەزیری دەرەوەی عێراق لەسەر داوای ئەنتۆنیۆ بلینکن، وەزیری دەرەوەی ئەمریکا سەردانی ئەو وڵاتەی کردووە بۆ بەشداریکردن لە لوتکەی وڵاتانی ئەندام لە هاوپەیمانیی ناتۆ و چەندین دیداری لەگەڵ بەرپرسانی بالای ئەمریکا و ناتۆ ئەنجامداوە.

لێدوانی فەرمی: فوئاد حوسێن، وەزیری دەرەوەی عێراق ڕایگەیاند:"لەگەڵ وەزیری دەرەوەی ئەمریکا و نوێنەرانی وەزارەتی گەنجینەی ئەمریکا لەبارەی پرسی، ئابووری، پەیوەندییە دارایی و بانکەکانی هاوبەش و بانکە سزادراوەکانی عێراق کفتۆگۆمان کرد".

زانیاریی زیاتر: فوئاد حوسێن ئەوەشی گوت، "کۆبوونەوەکان ڕاشکاو، گرنگ و بەسوود بوون و هەنگاوی جدی لە لایەن ئەمریکاوە هەیە بۆ چارەسەرکردنی ئەم گرفتانە". 

ئەوەی پێویستە بیزانیت: وەزارەتی گەنجینەی ئەمریکا، بەتۆمەتی سپیکردنەوەی پارە و ڕەوانەکردنی بۆ ئەو گرووپانەی دژبەری ئەمریکان، سزای بەسەر 27 بانکی عێراقیدا سەپاندووە.