ئەمساڵ 290 هەزار تۆن بەرهەمی سەوزە و میوە لە هەولێرەوە هەناردە کراوە

ئاڤا نیوز

ڕۆژانە نزیکەی 400 بارهەڵگر، بەرهەمی سەوزە و میوە لە عەلوەی هەولێرەوە بۆ شارەکانی ناوەڕاست و خوارووی عێراق هەناردە دەکرێت.

وێنە گەورەکە: بەهۆی ئەو لێکتێگەیشتنەی لەنێوان وەزارەتی کشتوکاڵی هەرێمی کوردستان و عێراق هەیە، ساڵانە ئاسانکاری بۆ هەناردەکردنی بەرهەمی جووتیاران دەکرێت.

لێدوانی فەرمی: وشیار جەلیل، بەڕێوەبەری هۆبەی چاودێری گومرگی کشتوکاڵی عەلوەی هەولێر بە ئاڤا نیوزی گوت: لە سەرەتای ئەمساڵەوە تا ئەمڕۆ 19 هەزار و 500 بارهەڵگری بەرهەمی سەوزە و میوە لە عەلوەی هەولێرەوە بۆ شارەکانی ناوەڕاست و خوارووی عێراق هەناردە کراوە، واتا بە تێکڕای 290 هەزار تۆن بەرهەمی سەوزە و میوە دەکات.

ئەوەی پێویستە بیزانیت: ئەو بەرهەمانەی هەناردەکراون بریتین لە پەتاتە، تەماتە، شووتی، کاڵەک، خەیار، باینجان.

زانیاریی زیاتر: وشیار جەلیل دەڵێت جگە لە هەناردەکردنی بەرهەم بۆ شارەکانی عێراق لەم چەند ڕۆژەدا 156 تۆن پەتاتە لەڕێگەی شەش ساردکەرەوە هەناردەی ڕۆژئاوای کوردستان کراوە.