هۆشداری لە پێدانی پاسپۆرتی دیپلۆماسی بە بەرپرسانی باڵا دەدرێت

ئاڤا نیوز 

ئەمڕۆ پەرلەمانی عێراق یاسای پاسپۆرت هەمواردەکاتەوە، ماددەی پێدانی پاسپۆرتی دیپلۆماسی بە بەرپرسانی باڵا زیاد دەکات.

وێنە گەورەکە: بڕیارە کاتژمێری 11ی پێش نیوەڕۆی ئەمڕۆ شەممە 20-7-2024 ئەنجوومەنی نوێنەرانی عێراق کۆببێتەوە، بەپێی کارنامەی دانیشتنەکە بێت خوێندنەوەی یەکەم بۆ دوو پرۆژە یاسا و گفتوگۆ و خوێندووەی دووەم بۆ دوو پرۆژە یاسای دیکە دەکات.

زانیاریی زیاتر: بڕگەی چوارەمی دانیشتنەکە تایبەتە بە خوێندنەوەی دووەم بۆ پێشنیازە یاسای هەمواری یەکەمی یاسای پاسپۆرت ژمارەی 32ی ساڵی 2015.

لێدوانی فەرمی: محەممەد خەفاجی، ئەندامی لیژنەی یاسایی لە پەرلەمانی عێراق ڕایگەیاند: پێدانی پاسپۆرتی دیپلۆماسی بە بەرپرسان و ئەندامانی خێزانەکانیان و مانەوەی ئەو پاسپۆرتە لەلایان دوای تەواوبوونی ئەرکەکانیان "کارێکی نایاسایی و مەترسیدارە".

هۆکارە زانراوەکان: بە گوتەی خەفاجی "ئەم پاسپۆرتە پەیوەندیدارە بە ماوەی ئەرک و کارەکانی بەرپرسان، دوای نەمانیان لە پلە و پۆستەکان پێویستە پاسپۆرتەکەیان لێ وەربگیرێتەوە".