تورکیا دەستگیرکردنی دوو شەڕڤان و 16 کۆچبەری نایاسایی ڕاگەیاند

ئاڤا دیجیتاڵ

وەزارەتی بەرگریی تورکیا دەستگیرکردنی دوو شەڕڤانی هەسەدە و 16 کەسی دیکەی ڕاگەیاند، کە ویستوویانە لە سنووری سووریا بەرەو تورکیا بپەڕنەوە.

لێدوانی فەرمی: وەزارەتی بەرگریی تورکیا بڵاوی کردووەتەوە : "شەڕی ئێمە لە دژی کۆچبەرە نایاساییەکان لە سنوورەکانمان بەردەوامە، ئەمڕۆ سەربازانی سەر سنوور 18 کەسیان دەستبەسەر کرد، کە دەیانویست لە سووریاوە بەشێوەیەکی نایاسایی ئاودیوی وڵاتەکەمان بن".

زانیاریی زیاتر: لە ئەنجامی لێکۆڵینەوەکاندا دەرکەوتووە دوو لەوانەی دەستگیرکروان شەڕڤانی هێزەکانی سووریای دیموکرات - هەسەدە و یەک کەسیشیان ئەندامی پارتی کۆمەنیستی تورکیا TKP/ML بووە.

باکگراوند: بەگوێرەی ئامارەکانی وەزارەتی بەرگریی تورکیا، لە کۆتاییەکانی ساڵی ڕابردووەوە زیاتر لە 150 کۆچبەری نایاسایی  لەسەر سنوور دەستگیرکراون، لەنێویاندا گەریلای پەکەکە و شەڕڤانانی هەسەدە هەن.