پەرلەمانتارێکی عێراق گەندەڵی گەورە ئاشكرا دەکات

ئاڤا نیوز

گەندەڵی لە سەرجەم دامودەزگەکانی عێراق بووەتە دیاردە و پەرلەمانتارێک دەڵێت، "پرۆژە هەبووە تێچووەکەی 30 جار لە تێچووی ڕاستەقینەی بووە".

وێنە گەورەکە: دیاردەی گەندەڵی لە عێراق جۆراوجۆرە، سەرجەم کەرتەکانی گرتووەتەوە و بەردەوام لە زیادبووندایە، بەهەدەردان و بردنی پارەی پرۆژەکانیش یەکێک لە گەندەڵییە دیارەکان.
 
لێدوانی فەرمی: یاسر حوسێنی، پەرلەمانتاری عێراق ڕایگەیاند: "لە شەقامێكی بەغدا ڕیزێک دار بە درێژایی یەك کیلۆمەتر بە تێچووی 124 ملیار دینار چێنراون، کە ئەمە چەندینجار زیاترە لە تێچووی خەمڵێنراوی پرۆژەکە".

زانیاریی زیاتر: یاسر حوسەینی بە پشتبەستن بە چاودێری و بەدواداچوونەکان هەندێک نموونە دەهێنێتەوە و دەڵێت، پرۆژە هەبووە 10 جار تێچووەکەی لە تێچووی ڕاستەقینەی زیاتر بووە، هەندێك پرۆژەش هەن 20 و 30 جار تێچووەکەی زیاتر بووە. 

ئەوەی پێویستە بیزانیت: بەپێی ڕێکخراوی شەفافیەتی نێودەوڵەتی، لە کۆی 180 وڵات، عێراق 157ـەمین وڵاتە لەڕووی گەندەڵییەوە.