بایدن لە هەڵبژاردنی سەرۆکایەتیی ئەمریکا دەکشێتەوە

ئاڤا نیوز 

 

جۆ بایدن، سەرۆکی ئەمریکا ڕایگەیاند، بڕیاری داوە خۆی بۆ هەڵبژاردنی سەرۆکایەتیی ئەمریکا بەربژێر نەکات و بکشێتەوە. 

 

ئەوەی پێویستە بیزانیت: بایدن پێشتر گوتبووی ئەگەر پزیشکەکانم پێم بڵین تەندروستیم باش نییە، ئەوا لە بەربژێربوون بۆ هەڵبژاردنی سەرۆکی ئەمریکا دەکشێمەوە.  

 

وێنە گەورەکە: ئەم بڕیارە دوای بەرزبوونەوەی دەنگی ناڕەزایەتییەکان دێت لە دژی خۆبەربژێرکردنی بایدن تایبەت لەلایەن دیموکراتەکان، ئەم ڕاگەیاندنە دوای هەڵسەنگاندنی دۆخەکە بوو لەگەڵ بەرپرسانی باڵای ئیدارەکەی.

 

ڕاگەیێنراوی فەرمی: بە گوێرەی ئەو نووسراوەی لە "ئێکس" بڵاوی کردووەتەوە، بایدن دەڵێت: "لەکاتێکدا مەبەستم بووە داوای دووبارە هەڵبژاردنەوەم بکەم، بەڵام پێموایە لە بەرژەوەندیی پارتەکەم و وڵاتدایە کە من دەستلەکاربکێشمەوە و تەنیا سەرنجم لەسەر جێبەجێکردنی ئەرکەکانم دەبێت وەک سەرۆک کۆمار لە ماوەی خولەکەم".

 

زانیاریی زیاتر: بایدن شانازی بە دەستکەوتەکانی لە ماوەی سێ ساڵ و نیوی حکومڕانی کرد، باسی لە بەهێزی ئابووریی ئەمریکا و وەبەرهێنانە مێژووییەکان کرد لە ئاوەدانکردنەوەی میللەت، باشترکردنی چاودێری تەندروستی و بەهێزکردنی دیموکراسی کرد.

هۆکارە زانراوەکان: بایدن، بەهۆی خراپی دۆخی تەندروستی تووشی بیرچوونەوە دەبوو، لەلایەکی دیکەوە خراپی ئاستی لە دیبەیتەکەی لەگەڵ ترەمپ جەماوەرەکەی تەواو لە خۆی بێهیوا کرد.