حکومەتی عێراق هەموو هاوکاری و بڕیارێکی بۆ گەڕانەوەی ئاوارەکانی شنگال ڕاگرتووە

ئاڤا نیوز

 

حکومەتی عێراق جگە لە ڕاگرتنی پێدانی چوار ملیۆن دینار بە ئاوارەکان، بڕیاری گەڕانەوەی ئاوارەکانیشی ڕادەگرێت. 

 

وێنە گەورەکە: ساڵی 2014 کاتێک چەکدارانی "داعش" قەزای شنگال و ناوچەکانی دەوروبەریان داگیرکرد، بە هەزاران خێزان ئاوارەبوون و هەزاران هاونیشتمانی ئێزدیش کوژران.

 

لێدوانی فەرمی: پیر دەیان جەعفەر، بەڕێوەبەری گشتیی کۆچ و کۆچبەرانی دهۆک بە ئاڤا نیوزی ڕاگەیاند: ئەگەرچی ئەمڕۆ 219 خێزان گەڕاونەتەوە بۆ گوندەکانی (تەل عوزێر، دوو گرێ و سکێنە)، بەڵام ماوەیەکە حکومەتی عێراق پێدانی چوار ملیۆن دیناری بۆ خێزانی ئاوارەکان ڕاگرتووە.

 

زانیاری زیاتر: پیر دەیان دەڵێت: بڕیار بوو 30-07 هەموو کەمپەکان دابخرێن، بەڵام ئەم بڕیارە وەستاوە، هاوکات دەمێکە هاوکاری ڕێکخراوی IOMـیش بۆ ئاوارەکان وەستاوە.

 

باکگراوند: هێشتا زیاتر لە 23 هەزار ئاوارەی ئێزدی لە پارێزگای دهۆک و ئیدارەی سەربەخۆی زاخۆ لە 15 کەمپ نیشتەجێن.