گەورەترین بەنداو لەسەر ئاستی پارێزگای دهۆک لە ئاکرێ دروست دەکرێت

ئاڤا نیوز

گەورەترین بەنداو لەسەر ئاستی پارێزگای دهۆک لە ئاکرێ دروست دەکرێت، هەزار دۆنم زەوی لە سێ ناوچە سوود لە ئاوەكەی دەبینن.

بۆچی گرنگە: بەنداوەکە دەتوانێت کارەبا بەرهەم بهێنێت و هەزار دۆنم زەوی لە سنووری شێخان و ئاکرێ و بەردەڕەش سوود لە ئاوەکەی دەبینن.

لێدوانی فەرمی: ئەندازیار ڕەمەزان شەریف، بەڕێوەبەری هۆبەی ئاودێری ئاکرێ بە ئاڤا نیوزی گوت: یەکێک لەو بەنداوە ستراتیژییانەی کە بڕیارە دروست بکرێت دەکەوێتە سنووری گوندی باکورمانی سەر بە قەزای ئاکرێ و دەبێتە گەورەترینی سەر ئاستی پارێزگای دهۆک.

زانیاریی زیاتر: بەرزی بەنداوەکە 112 مەتری کۆنكرێتییە، درێژاییەکەی 300 مەترە و  500 ملیۆن مەتر سێجا ئاو لەخۆ دەگرێت و بە گوژمەی 330 ملیۆن دۆلار دروست دەکرێت.

ئەوەی پێویستە بیزانیت: بەهۆی بەنداوەکەوە هەشت گوند ژێر ئاو دەکەون و بڕیارە دانیشتووانیان بە گوژمەی 100 ملیۆن دۆلار قەرەبوو بکرێنەوە.

خاڵی ئەرێنی: ڕێکاری دەستپێکردنی پرۆژەکە تەواوکراون و 24 مێگاوات کارەبا بەرهەم دەهێنێت، بەم زووانە کۆمپانیای جێبەجێکار ڕادەسپێردرێت.