یەکێتی لەبەرامبەر ئازادکردنی 500 زیندانی عەرەب پۆستی پارێزگاری کەرکووک وەردەگرێت

ئاڤا نیوز 

 

یەکێتیی نیشتمانیی کوردستان و بەشێکی لایەنە عەرەبییەکان ڕێککەوتوون لەسەر دابەشکردنی پۆستی پارێزگاری کەرکووک بەشێوەی دوو ساڵ بە دوو ساڵ، کە دوو ساڵی سەرەتا یەکێتی وەریدەگرێت، لەبەرامبەردا دەبێت یەکێتی زیندانییانی عەرەب ئازاد بکات.

 

وێنە گەورەکە: 19 ڕۆژ بەسەر یەکەم دانیشتنی ئەنجوومەنی پارێزگای کەرکووک تێدەپەڕێت و دەبێت لە ماوەی 11 ڕۆژی داهاتوو ڕێککەوتن لەبارەی پۆستەکانی ئەنجوومەنەکە بکرێت؛ لە ئەگەری ڕێکنەکەوتن پارێزگارێکی بەوەکالەت لەلایەن سوودانییەوە دادەنرێت. 

 

چیرۆکی سەرەکی: دوای ڕووخانی ڕژێمی بەعس لە ساڵی 2003 یەکێتی ئیدارەی ئەمنیی کەرکووکی گرتەدەست، لەدوای سەرهەڵدانی داعش و نالەباربوونی دۆخی ئەمنیی پارێزگاکە، زیندانییانی ئەو شارە کە بەشێکی زۆریان عەرەبن بۆ زیندانەکانی سلێمانی گواسترانەوە. 

 

زانیاریی تایبەت: سەرکردەیەک لە هاوپەیمانێتیی عەرەبی کە نەیویست ناوی ئاشکرا بکرێت بە ئاڤا نیوزی گوت، "یەکێک لە مەرجەکانی ئەو لایەنە عەرەبییانەی کە لەگەڵ یەکێتی ڕێککەوتوون، ئازادکردنی 500 زیندانیی عەرەبە لە زیندانەکانی سلێمانی، یەکێتیش بەم مەرجە ڕازی بووە".

 

هۆکارە زانراوەکان: لایەنە عەرەبییەکان بۆ دامرکاندنەوەی توڕەیی شەقامی عەرەبی لە بەرامبەر پێدانی دوو ساڵی پۆستی پارێزگار بە یەكێتی داوای ئازادکردنی ئەو زیندانییە عەرەبانە دەکەن. 

 

زانیاریی زیاتر: بەپێی ڕێککەوتنەکە ئەوانەی بە بڕیاری دادگەی عێراق و لەژێر ڕێنمایی وەزارەتی داد دەستگیر کراون ئازاد ناکرێن، بەڵام دەبێت بۆ زیندانەکانی کەرکووک بگوازرێنەوە، ئەوانەشی هیچ تۆمەتێکیان لەسەر ساغ نەبووەتەوە پێویستە ئازاد بکرێن.

 

ڕێککەوتنەکە بەمشێوەیە: یەکێتی و لایەنە عەرەبییەکان لەسەر ئەم خاڵانە ڕێککەوتوون: 

 

- هاوبەشیی ڕاستەقینە لە بەڕێوەبردنی پۆستەکانی شارەکە لەنێوان هەردوولا

 

- پۆستی پارێزگار دوو ساڵ بۆ یەکێتی و دوو ساڵ بۆ عەرەب دەبێت

 

- ناکرێت پارێزگار لەژێر سێبەری بڕیارەکانی حیزبەکەی بجووڵێتەوە و مەرجە یەکسانی لەنێوان پێکهاتەکان بپارێزرێت و خزمەتی دانیشتووانی پارێزگاکە بکات