دەستپاكیی عێراق ناسنامەی تۆمەتبارانی "دزیی سەدە" ئاشكرا دەكات

ئاڤا نیوز  

دەستەی دەستپاكیی عێراق دەستگیركردنی ئەو تۆمەتبارانەی ڕاگەیاند كە تۆمەتباران بە "دزینی" پارەی باج، هاوكات ناسنامەی تۆمەتبارەكان و چۆنیەتی دەستگیركردنیان و بڕە پارەكەشی ئاشكراكرد.

وێنە گەورەكە: لە مانگی ئازاری ساڵی 2023، دەسەڵاتی دادوەری عێراق فەرمانی دەستگیركردنی بۆ چوار بەرپرسی باڵای حكومەتی پێشوو بە سەرۆكایەتی مستەفا كازمی دەركرد، بە تۆمەتی "ئاسانكاریكردن بۆ دەستبەسەرداگرتنی "2.5 ملیار دۆلار لە سامانی گشتی لە یەكێك لە گەورەترین سكانداڵەكانی گەندەڵی دارایی لە وڵاتەكەدا.

لێدوانی فەرمی: حەیدەر حەنوون، سەرۆكی دەستەی دەستپاكیی عێراق  لە كۆنگرەیەكی ڕۆژنامەوانیدا ڕایگەیاند: "بابەتی دزیی سەدە نامرێت هەرچەندە گەندەڵكاران بیانەوێت ئەو بابەتە لە دەزگا یاساییەكان و خەڵك بشارنەوە، بەرەنگاربوونەوەی گەندەڵی یەكێكە لە كارە لە پێشینەكانی حكومەت".

زانیاریی زیاتر: قاسم محەممەد، یەكێكە لە تۆمەتبارانی سەرەكی دۆسیەی دزینی پارەی باج بە بڕی 988 ملیار دیناری عێراقی دوای ئەوەی بۆ توركیا هەڵاتبوو لە هەرێمی كوردستان توانرا دەستگیر بكرێت و ڕادەست بكرێتەوە، هاوكات نوور زوهێر، كە تۆمەتباری ڕاسپێردراوە دادگەیی دەكرێت".