زەریف بووە یاریدەدەری ستراتیژیی پزیشکیان

ئاڤا نیوز

مەسعود پزیشکیان، سەرۆککۆماری ئێران، بە فەرمانێک محەمەد جەواد زەریف-ی وەک یاریدەدەری ستراتیژیی خۆی دەستنیشان کرد.

وێنە گەورەکە: پزیشکیان لە فەرمانێكدا داوای لە زەریف کردووە بەرپرسیارێتیی "ناوەندی بەدواداچوونە ستراتیژییەکانی سەرۆکایەتیی کۆمار" لە ئەستۆ بگرێت و ناوەندەکە بکاتە دامەزراوەیەک بۆ یاریدەدەریی ستراتیژیکیی سەرۆکایەتیی کۆمار.

زانیاریی زیاتر: بە گوێرەی فەرمانەکە، یاریدەدەری ستراتیژیی سەرۆککۆمار بە سوودوەرگرتن لە ئەزموونی بەڕێوەبەرانی باڵای خولەکانی پێشوو، دەستەبژێران، ناوەندەکانی بیر و دامەزراوەکانی کۆمەڵگای مەدەنی پێشبینیی پێشهاتە گەورە ناوخۆیی و دەرەکییەکان دەکات و بە ڕاپۆرت دەیانداتە سەرۆککۆمار. 

ئەوەی پێویستە بیزانیت: زەریف لە 2013-2021 وەزیری دەرەوەی ئێران بوو، لە 2015 کە ئەو بەرپرسی شاندی دانووستانکاری ئێران بوو ڕێککەوتنی ئەتۆمی نێوان ئێران و وڵاتانی ڕۆژئاوا واژۆ کرا.