بۆچی ئاوارەکانی شنگال ناگەڕێنەوە ناوچەکانیان؟

ئاڤا نیوز

 

بەڕێوەبەری كۆچ و كۆچبەرانی دھۆک ڕایدەگەیێنێت، بەهۆی ئاسایی نەبوونەوەی دۆخی قەزای شنگال، تەنیا نزیکەی 30%ـی ئاوارەکان گەڕاونەتەوە.

لێدوانی فەرمی: سەعید جردۆ، سەرۆکی بنکەی لالشی ڕۆشنبیری و هونەری بۆ ئاڤا نیوز گوتی: حکومەتی عێراق هیچ زەمینەسازییەکی بۆ گەڕانەوەی ئاوارەکان نەکردووە بۆ ئەوەی بگەڕێنەوە زێدی خۆیان، بەم شێوەیەی ئێستا خەڵک باوەڕیان بە دۆخی شنگال و پارێزراوی خۆیان نییە.

هۆکارە زانراوەکان: حکومەتی عێراق تەنیا چوار ملیۆن دینار دەدات بەهەر خانەوادەیەک کە دەگەڕێنەوە ناوچەکانیان، بەمەش ناتوانن دووبارە خانووە ڕووخاوەکانیان دروست بکەنەوە، ئەمە جگە لە نەبوونی دۆخێکی ئەمنی باش و خزمەتگوزاری، سەرۆکی بنکەی لالش وادەڵێت.

ئاماری ئاوارەبوون لە شنگال
لەگەڵ هێرشی داعش زیاتر لە 400 هەزار کەس ئاوارەی هەرێمی کوردستان بوون، ئێستاش 23 هەزار و 500 خێزان لەناو 15 کەمپ و نزیکەی 35 هەزار خێزانیش لە دەرەوەی کەمپ ژیان بەسەردەبەن و زیاتر لە 100 هەزار کەسیش ڕوویان لە دەرەوەی وڵات کردووە.

تەنیا %30 ی ئاوارەكان گەڕاونەتەوە
 پیردەیان جەعفەر، بەڕێوەبەری كۆچ و كۆچبەرانی دھۆک بە ئاڤا نیوزی ڕاگەیاند: تاوەکو ئێستا نزیکەی 30%ـی ئاوارەکان گەڕاونەتەوە سنووری شنگال، لەوانەش بەشێکیان گلەیی لە دۆخی ئەمنیی و خزمەتگوزاری دەکەن، چونکە گرووپی چەکداری تێدایە و خزمەتگوزارییەکان خراپن.

 

حكومەتی عێراق بڕیاری داخستنی كەمپەكانی دا
حکومەتی عێراق بڕیاری داخستنی کەمپەکانی هەرێمی کوردستان و گەڕاندنەوەی ئاوارەکانی هەبوو، بەبێ ئەوەی خوێندنەوە بۆ دۆخی ناوچەکانیان بکات و ئەمەش نیگەرانی ئاوارکانی لێکەوتەوە و بە هەوڵێکی زۆرەملێیان ناوبرد و حکومەتی هەرێمی کوردستانیش ڕەتیکردەوە هیچ ئاوارەیەک بەزۆر بگەڕێنرێتەوە.

چی ڕوودەدات؟
 دوای هەوڵەکانی حکومەتی هەرێمی کوردستان بۆ بەرچاوگرتنی دۆخی ئاوارەکان حکومەتی عێراق بڕیاری گەڕاندنەوەی ئاوارەکانی ڕاگرت و ئێستاش گفتوگۆ لەنێوان هەردوولا هەن و لیژنەی باڵای هاوبەش بۆ ئەو مەبەستە لە ئایندەیەکی نزیکدا کۆدەبنەوە.

بەهۆی هێرشی داعشەوە 80%ـی ژێرخانی شنگال وێران بووە
پێشتر ڕێکخراوی هیومان ڕایتس وۆچ لە ڕاپۆرتێکدا ئاماژەی بەوەدابوو: بەهۆی هێرشی داعشەوە 80%ـی ژێرخانی شنگال و 70%ـی خانووەکانی وێران بوون، بەپێی ڕاپۆرتەکە، تاوەکو ئێستا ئەو قەزایە نائارامە و ئەو خزمەتگوزارییانەیان نییە کە پێویستن بۆ گەرەنتیکردنی مافە ئابووری، کۆمەڵایەتی و کولتوورییەکانیان.