کۆبوونەوەکانی لیژنەی باڵای سەربازیی عێراق و هێزەکانی هاوپەیمانان دەستپێدەکاتەوە

ئاڤا دیجیتاڵ

 

خشتەیەک بۆ دیاریکردنی وادەی کۆتاییهێنان بە ئەرکی هێزەکانی هاوپەیمانان لە عێراق دادەرێژرێت و لیژنەیەک بۆ ئەو مەبەستە پێکدەهێنرێت.

 

وێنە گەورەکە: هێرشی گرووپە چەکدارەکان بۆ سەر هێزەکانی ئەمریکا و هاوپەیمانان لە ناوچەکە بەردەوامە؛ حکومەتی عێراق بۆ سەقامگیری و ئەمریکاش بۆ کەمکردنەوەی ئەو هێرشانە دەیەوێت بە گفتوگۆ و ڕێککەوتن کۆتایی بە ئەرکی هێزەکانیان بهێنرێت. 

 

ڕاگەیێنراوی فەرمی: "ئەمڕۆ یەکشەممە 11-2-2024، لیژنەی باڵای سەربازیی عێراق کۆبوونەوەکانی لەگەڵ هێزەکانی هاوپەیمانی نێودەوڵەتی لە بەغدا دەستپێکردەوە و درێژە بە کۆبوونەوەکان دەدەن؛ هەنگاو بۆ پەیوەندییەکی دووقۆڵی دەنرێت". یەحیا ڕەسووڵ، گوتەبێژی فەرماندەی گشتیی هێزە چەکدارەکانی عێراق ڕایگەیاندووە.

 

زانیاریی زیاتر: دوای کۆکردنەوەی واژۆی زیاتر لە 160 پەرلەمانتار، شەوی ڕابردوو ئەنجوومەنی نوێنەرانی عێراق دانیشتنێکی بۆ "دەرکردنی هێزەکانی ئەمریکا" ئەنجامدا، دانیشتنەکە تەنیا دوو کاتژمێری خایاند و بۆ کاتێکی نادیار دواخرا. زۆرینەی پەرلەمانتاری فراکسیۆنە کوردییەکان بەشدارییان نەکرد.