وەزارەتی دەرەوەی ئێران: وەڵامدانەوەمان لە چوارچێوەی ڕێسا و یاسا نێودەوڵەتییەکان دەبێت

ئاڤا نیوز 

 

ناسر کەنعانی، گوتەبێژی وەزارەتی دەرەوەی ئێران لەبارەی هێرشکردنە سەر ئیسرائیل جەخت دەکاتەوە کە وەڵامدانەوەیان بۆ ئیسرائیل لە چوارچێوەی یاسا و ڕێسا نێودەوڵەتییەکان دەبێت. 

 

وێنە گەورەکە: ئێران، ئیسرائیل بە کوشتنی هەنیە تۆمەتبار دەکات و پێی وایە ئەمە پێشێلکردنی سەروەریی خاکی ئەو وڵاتە و پێشێلی یاسای نێودەوڵەتییە. ئێران دەڵێت "ئێمە مافی خۆمانە کە بەرگری لە ئاسایشی نەتەوەیی و سەروەریی خاکی خۆمان بکەین". هاوکات ڕوونی دەکاتەوە کە "وەڵامدانەوەی ئێمە بۆ ئیسرائیل لە چوارچێوەی یاسا نێودەوڵەتییەکان دەبێت".

 

لێدوانی فەرمی: ناسر کەنعانی، گوتەبێژی وەزارەتی دەرەوەی ئێران، لە کۆنگرەیەکی ڕۆژنامەوانیدا ڕایگەیاند: ئێران بۆ سزادانی ئیسرائیل چاوەڕێی هیچ کەس و لایەنێک ناکات و خۆی بەرگری لە خۆی دەکات، ئێمە ناتوانین دەستەوەستان بین و بەرگری لە ئاسایشی خۆمان و ئاسایشی دۆستان و ناوچەکەمان دەکەین. پێویستە ئەنجوومەنی ئاسایش بە ئەرکی خۆی هەستێت کە دابینکردنی ئاسایشی نێودەوڵەتییە. نابێت کەس گومان لە مافی ئێران لە سزادانی ئیسرائیل بە گوێرەی یاسا نێودەوڵەتییەکان بکات

 

لەلایەکی دیکەوە: حوسێن سەلامی، فەرماندەی گشتیی سوپای ئێران ڕایگەیاند، وەڵامی ئێران بۆ ئیسرائیل لە تۆڵەی کوشتنی ئیسماعیل هەنیە هێندە تووند دەبێت کە ئیسرائیل تێبگات لە چ هەڵەیەکی کردووە.

 

ئەوەی پێویستە بیزانیت: ڕۆژی 31-07-2024 ئیسماعیل هەنییە، لە تاران، کوژرا، لەو کاتەوە جیهان چاوەڕێی تۆڵەسەندنەوەی ئێرانە و ئێران هێشتا کاردانەوەی ڕاستەوخۆی کرداریی نەبووە.