21 ڕۆژە بازرگانێكی سلێمانی ڕفێنراوە و چارەنووسی نادیارە

ئاڤا نیوز

21 ڕۆژە بازرگانێكی شاری سلێمانی بەناوی "كوردۆ حاجی برایم ئاغا"  لەلایەن هێزێكی دەمامكدارەوە ڕفێنراوەو كەسوكارەكەی سۆراغی دەكەن.

وێنە گەورەكە: لەماوەی ڕابردوودا ڕووداوی ڕفاندن و كوشتن لە سنووری پارێزگای سلێمانی لە حاڵەتەوە بووەتە دیاردە.

زانیاریی بەدەستهاتوو: كەسێك لە خانەوادەی كوردۆ حاجی برایم بە ئاڤا نیوزی گوت: "لە ڕۆژی 15ی مانگی ڕابردوەوە، لەماڵەكەی خۆیدا، كوردۆ و كوڕەكەی ڕفێنراون، دوای دوو ڕۆژ كوڕەكەی ئازاد دەكەن، تا ئێستا نازانرێت ئەو هێزەی ڕفاندویەتی كێن هێندە دەزانرێت دەمامكدار بوون".

زانیاریی زیاتر: ئەو سەرچاوەیە دەڵێت:"چووینەتە لای هەر بەرپرسێك قسەیەكی جیاواز دەكەن، تەنانەت دەڵێن لەبەرئەوەی لایەنگری لاهوور شێخ جەنگی بووە، بەڵام چونكە بازرگانە ئێمە مەزەندەی ئەوە دەكەین بۆ مەبەستی وەرگرتنی سەرانە بێت".

باكگراوند: بەگوێرەی ئەو ئامارەی دەست ئاڤا نیوز كەوتووە، لەماوەی ساڵێك و شەش مانگدا 25 كەس بەدەستی بەشێك لە هێزە ئەمنییەكانی سلێمانی كوژراون، كوشتنی ئاری چایچی و برینداركردنی دوو هاونیشتمانی دیكە بە دەستی هێزەكانی كۆماندۆ دوایەمین ڕووداو بوون تۆماركراون.