ئەمساڵ هیچ تووشبوویەكی پەتای كۆلێرا لە هەولێر تۆمار نەكراوە

ئاڤا نیوز  

بەڕێوەبەری خۆپاراستنی تەندروستیی هەولێر ڕایگەیاند، پەتای كۆلێرا لە هەرێمی كوردستان تا ڕادەیەكی باش كۆنتڕۆڵ كراوە و ئەمساڵ هیچ تووشبوویەك لە سنووری هەولێر تۆمار نەكراوە.

بۆچی گرنگە: كۆلێرا نەخۆشییەکی درمی کوشندەیە کە دەبێتە ھۆی ھەوکردنی ریخۆڵە، لە ئەنجامی توشبوون بەم بەکتریایە مرۆڤ توشی سکچوونێکی توند دەبێت، تۆمارنەكردنی هیچ حاڵەتێك لە پایتەختی هەرێمی كوردستان، هەواڵێكی گرنگە.

لێدوانی فەرمی: د. بێریڤان یاسین، بەڕێوەبەری خۆپاراستنی تەندروستیی هەولێر: پەتای كۆلێرا لە هەرێمی كوردستان تا ڕادەیەكی باش كۆنتڕۆڵ كراوە و ئەمساڵ هیچ حاڵەتێكی پەتای كۆلێرا لە سنووری هەولێر تۆمار نەكراوە.

هۆكارە زانراوەكان: هۆكاری سەرەكیی بڵاوبوونەوەی پەتای كۆلێرا دەگەڕێتەوە بۆ ئەو سەوزەمیوەیەی كە بە ئاوی پیس ئاو دەدرێن، ئەم حاڵەتەش بەراورد بە پێشووتر كەم بووەتەوە و تیمەكان بە بەردەوامی چاودێری شوێنەكان دەكەن، هۆكارێكی دیكە پیسیی ئاوی بیرەكانە ئەمەش لەڕێگەی كلۆرەوە چارەسەر دەكرێت. د. بێریڤان یاسین، وادەڵێت.