دوو بەرپرسی دیكەی حیزبوڵڵا دەکوژرێن

ئاڤا نیوز

 

سەرچاوەیەکی ئاسایشیی لوبنان ڕایگەیاند: لە هێرشێکی ئاسمانیی ئەمڕۆدا بەرپرسێکی حیزبوڵڵا بە سەختی بریندار بووە.

چیرۆکی سەرەکیی: دوای ئەوەی چەند ڕۆژێکە ئیسرائیل دەستی کردووە بە زنجیرەیەک هێرش لە دژی سەرکردە و بەرپرسەکانی حەماس و حیزبوڵڵا لە لوبنان و فەڵەستین، ئەمڕۆش هێرشی کردووەتە سەر دوو ئامانج لە لوبنان و بریندار و کوژراو هەن.

هێرشێکیان لە نزیکی سنووری لوبنان و ئیسرائیل بووە، ئۆتۆمبێلێكی بەرپرسێکی حیزبوڵڵا بە ئامانج گیراوە، بەرپرسەکە بە سەختیی بریندار بووە؛ بە گوێرەی ڕاپۆرتی ئاژانسی هەواڵی نەتەوەیی لوبنانیش لە گوندی تەیر حەرفا، لە ڕۆژئاوای لوبنان، لە هێرشێکی ئاسمانیی ئیسرائیلدا بۆ سەر ماڵێک، دوو کەس بە سەختی بریندار بوون.

حیزبوڵڵا ڕایگەیاند دوو لەچەکدارەکانیان بە دەستی ئیسرائیل کوژراون، بەڵام دیارییان نەکرد کێن.

لێدوانی فەرمی: سەرچاوە ئاسایشییە لوبنانییەکە گوتی "هێرشەکە بەرپرسێکی ناوخۆی حیزبوڵڵای لە شارۆچکەی بنت جبەیل بە ئامانج گرتووە و بە سەختی بریندار بووە".

 

لێدوانی لایەنی بەرامبەر: سوپای ئیسرائیل لە تۆڕی کۆمەڵایەتیی ئێکس ڕایگەیاند: "فڕۆکەیەکمان لە ناوچەی مارون ئەررەئس، لە باشووری بنت جبەیل، لە ئوتومبێلێکی داوە کە تیرۆریستێکی حیزبوڵڵای تێدا بووە".