کوڕێکی ئیسماعیل هەنییە نهێنییەکی دیکەی کوشتنی باوکی ئاشکرا دەکات

ئاڤا نیوز 

کوڕی ئیسماعیل هەنییە نهێنییەکی نوێ، لەبارەی شێوازی بەئامانجگرتنی ئیسماعیل هەنییەی باوکی ئاشکرا دەکات.

وێنە گەورەکە: تاوەکو ئێستا شێوازی کوشتنی ئیسماعیل هەنییە، سەرۆکی پێشووی مەکتەبی سیاسیی بزووتنەوەی حەماس ناڕوونە، بەگوتەی یەکێک لە کوڕەکانی لە ڕێگەی دەستنیشانکردنی شوێنی مۆبایلەکەی مووشەکی ئاڕاستە کراوە.

لێدوانی فەرمی: عەبدولسەلام هەنییە، کوڕی ئیسماعیل هەنییە گوتی: مووشەک شوێنی مۆبایلەکەی کەوتووە کە لە نزیک سەرینەکەی داینابوو و مووشەکەکە ڕاستەوخۆ بەر جەستەی کەوتووە.

زانیاریی زیاتر: عەبدولسەلام هەنییە ڕەتیدەکاتەوە بۆمب لە ژووری مانەوەی چێندرابێت وتەقێنرابێتەوە، چونکە ئەگەر وابووایە ئەوا چەندین پاسەوان و ڕاوێژکاری دیکە لە ژوورەکانی تەنیشت ژوورەکەی باوکی بوونە و هەندێکیانیش لەهەمان ژوور دانیشتبوون، بەڵام هیچ زیانێکیان بەرنەکەوتووە.

ئەوەی پێویستە بیزانیت: ئیسماعیل هەنییە لە شەوی 31ی تەمموزی 2024 لە شوێنی مانەوەی لە تارانی پایتەختی ئێران بە مووشەکێک کرایە ئامانج، حکومەتی ئێران، ئیسرائیلی تۆمەتبار کرد.