70 تۆن دەرمان و پاشماوەی تەندروستی بە ڕێگەی زانستی لەناو براون

ئاڤا نیوز  

لە هەولێر دەرمان و پاشماوەی تەندروستی، بە ڕێگەی زانستی لەناودەبرێت و دەرمانی بەکارنەهاتووی هاونیشتمانیانیش وەردەگیرێتەوە و لەناودەبرێت.

وێنە گەورەکە: لە نەخۆشخانەکانی هەولێر زبڵ و پاشماوەی تەندروستی پۆلێن دەکرێن بۆ کەلوپەلی تیژ، پاشماوەی پزیشکی، پاشماوەی دەرمان، پاشماوەی چارەسەری کیمیایی و زبڵ و خاشاکی ئاسایی، هەریەکێکیان لەو پاشماوانە بەڕێگەی تایبەت لەناو دەبردرێن.

لێدوانی فەرمی: د.ئارەزوو حەسەن، بەڕێوەبەری دڵنیایی جۆری و کۆنترۆڵی هەوکردن لە بەڕێوەبەرایەتی گشتی تەندروستی هەولێر بە ئاڤانیوزی گوت:"بەپێی ڕێنماییەکانی ڕێکخراوی تەندروستی جیهانی پاشماوەکان پۆلێن دەکەین و هەر پاشماوەیەک بەپێی جۆری خۆی بە ئامێری تایبەت کرداری لەناوبردنی بۆ دەکرێت".

زانیاریی زیاتر: د.دلۆڤان محەممەد، بەڕێوەبەری گشتی تەندروستی هەولێر  بە ئاڤا نیوزی گوت:"لەناو بردنی ئەو دەرمان و پاشماوەی تەندروستیانە بە ڕێگەیەکی زانستییە و هیچ کاریگەری لەسەر ژینگە و تەندروستی مرۆڤ نییە".

ژمارەکان وا دەڵێن: لە شەش مانگی یەکەمی ئەمساڵ 40 تۆن پاشماوەی تەندروستی بە ڕێگەی زانستی لەناوبراون، لە ماوەی یەک ساڵیش نزیکەی 30 تۆن دەرمان لە هاونیشتمانیان وەرگیراوەتەوە و لەناوبراوە".