شوێنگرەوەی ڕێبوار تەها لە ئەنجوومەنی پارێزگای کەرکووک دەستبەکار دەبێت

ئاڤا نیوز

عەبدوڵڵا میروەیس  لە دادگای کەرکووک سوێندی یاسایی خوارد و لەبری ڕێبوار تەها وەکو ئەندامی ئەنجوومەنی پارێزگای کەرکووک دەستبەکار بوو.

وێنە گەورەکە: دوای ئەوەی ڕێبوار تەها وەک پارێزگاری کەرکووک هەڵبژێردرا،  ژمارەی ئەندامانی یەکێتی لە ئەنجوومەنی پارێزگای کەرکووک بۆ چوار ئەندام کەمبووەوە  و پێویست بوو یەدەگی یەکەم لە هاوپەیمانیی کوردستان بچێتە شوێنی.

بۆچی گرنگە: هەڵبژاردنی ڕێبوار تەها وەکو پارێزگار گرفتی بۆ کۆبوونەوەی ئەنجوومەنی پارێزگای کەرکووک دروست کردبوو، چونکە یەکێتی لەگەڵ یەک ئەندامی کۆتای کریستیان و سێ ئەندامی عەرەب کە حکومەتی خۆجێیان پێکهێناوە، دەبوونە هەشت ئەندام و نەیاندەتوانی ڕێژەی یاسایی 50+1ـی تەواو بکەن.

زانیاریی بەدەستهاتوو: دیار محەممەد، پەیامنێری ئاڤا لە کەرکووک ڕایگەیاند، "ئەمڕۆ چوارشەممە عەبدوڵڵا میر وەیس کە یەدەگی یەکەم بوو لە لیستی هاوپەیمانیی کەرکووک هێز و ئیرادەمانەیە، وەک ئەندامی نوێی ئەنجوومەنی پارێزگای کەرکووک سوێندی یاسایی خوارد."

ئەوەی پێشبینی دەکرێت: چاوەڕوان دەکرێت سەرۆکی ئەنجوومەنی پارێزگای کەرکووک بانگهێشتی کۆبوونەوە بڵاوبکاتەوە و پۆستە ئیدارییەکانی پارێزگاکە هەڵبژێردرێن.