چین یانزە بنکەی ئەتۆمی نوێ دروست دەکات

ئاڤا نیوز

 

چین بڕیاری دروستکردنی یانزە ڕیاکتۆری ئەتۆمی نوێ بە بەهای 31 ملیار دۆلاری ئەمریکی دەرکرد، ئەم بنکانە دەکەونە پێنج شوێنی جیاواز لە پارێزگاکانی جیانگسو، شاندۆنگ، گوانگدۆنگ، ژێجیانگ و گوانگشی، ئامانج لێی دابینکردنی وزەی زیاترە بە ڕەچاوکردنی گۆڕانی کەشوهەوا.

 

وێنە گەورەکە: چین بڕیاری داوە لە پێنج ناوچەی جیاواز، یانزە بنکەی بەرهەمهێنانی وزە لە ڕێگەی بوونیادنانی ڕیاکتۆری ئەتۆمی دروست بکات، تێچووی بوونیادنانی ئەم بنکە ئەتۆمییانە 31 ملیار دۆلارە. ئەمە لەکاتێدایە، پێشتر لە ساڵانی 2022 و  2023 چین ڕەزامەندی لەسەر دروستکردنی 10 ڕیاکتۆری نوێی دابوو. ژمارەی ریاکتۆرەکانی ئەم وڵاتە گەیشتە 55ڕیاکتۆر و لە دوای ئەمریکا و فەرەنسا لە پلەی سێیەم دایە. 

 

زانیاریی زیاتر: کۆمپانیای گشتیی وزەی ئەتۆمی چین، کۆمپانیایەکی سەر بە دەوڵەتە، ئەرکی دروستکردنی 6 ڕیاکتۆر و کۆمپانیای نیشتمانیی وزەی ئەتۆمی چین 3 دانە و کۆمپانیای وەبەرهێنانی کارەبای دەوڵەت ئەرکی دروستکردنی 2 ڕیاکتۆر لە ئەستۆ دەگرن.

 

ئەوەی پێویستە بیزانیت: ڕیاکتۆرە ئەتۆمییەکان بە دڵی وێستگەی ئەتۆمی دادەنرێت، رۆڵی گرنیان هەیە لە دابینکردنی کارەبا و وزەی پێویست بە کەمترین کاریگەری لەسەر کەشوهەوا و پیسبوونی ژینگە هەیە.