کۆمیسیۆن کامێرای زیرەک بۆ هەڵبژاردنی پەرلەمانی کوردستان بەکاردەهێنێت

ئاڤا نیوز

 

ئامادەکارییەکانی کۆمیسیۆنی باڵای هەڵبژاردنەکانی عێراق بۆ سەرپەرشتیکردنی هەڵبژاردنی پەرلەمانی کوردستان بەردەوامن، سەرووی 14 هەزار کامێرای زیرەک لە سەرجەم وێستگەکاندا دادەنرێن.

 

وێنە گەورەکە: قۆناغی یەکەمی ڕاهێنانی کارمەندانی  کۆمیسیۆن دەستیپێکرد، لە قۆناغی دووەم کە 10-09-2024 دەکرێت، ڕاهێنان لەسەر چوار ئامێر دەکرێت کە یەکێکیان کامێرای زیرەکە و یەکەمین جارە لە هەڵبژاردنی پەرلەمانی کوردستان تاقی دەکرێتەوە.

 

ئەوەی پێویستە بیزانیت: یەکێک لە ئامێرەکان پەیوەستە بە تۆماری پەنجەمۆر و داتا و زانیارییەکانی دەنگدەری لەسەر تۆمارکراون. ئامێرێکی دیکە پەیوەستە بە هەژمارکردنی دەنگی لایەنەکان و جیاکردنەوەی دەنگی بەربژێرەکان، جگە لەوەش ئامێرێک لەڕێگەی مانگی دەستکرد دەبەسرێتەوە بە ئۆفیسی سەرەکی لە بەغدا  و ڕاستەوخۆ ئەنجامەکان دەنێرێت.

 

لێدوانی فەرمی: خالید عەباس، بەرپرسی ئۆفیسی دهۆکی هەڵبژاردنەکانی عێراق بە ئاڤا نیوزی گوت: "بۆ هەر وێستگەیەک دوو کامێرای زیرەک دادەنرێت، کۆمەڵێک تایبەتمەندییان هەیە، کاتێک ناتوانێت ڤیدیۆ تۆماربکات ئاگادارت دەکاتەوە، کە شەحنی نەما ئاماژە بۆ بارگاویی کردنەوە دەکات".

 

زانیاریی زیاتر: 14 هەزار و 140 کامێرای زیرەک لە حەوت هەزار و 70 وێستگەی دەنگدانی گشتی و تایبەتدا دادەنرێن.