بە هۆی وەرگەڕانی بەلەمێکەوە 10 کۆچبەر گیانیان لەدەست دا

ئاڤا نیوز

بە هۆی وەرگەڕانی بەلەمێکی کۆچبەران لە ڕووباری درینا لە سنووری نێوان سربیا و بۆسنە، لانیکەم 10 کەس گیانیان لەدەست دا و ژمارەیەکی دیکەش بێسەروشوێن بوون.

چیرۆکی سەرەکی: بەلەمەکە نزیکەی 24 کۆچبەری هەڵگرتووە و ویستوویانە لەو ڕێگەیەوە خۆیان بگەیێننە وڵاتانی ئەوروپای ڕۆژئاوا. تیمەکانی فریاکەوتن تەرمی 10 کەسیان لە ڕووبارەکە دەرهێناوەتەوە کە یەکێکیان منداڵێکی نۆ مانگە لەگەڵ دایکیدا خنکاوە. 

زانیاریی زیاتر: پۆلیس ناسنامەی کۆچبەرەکانی ئاشکرا نەکردووە، بەڵام زۆربەی ئەو کۆچبەرانەی بەم ڕێگایەدا دەڕۆن خەڵکی وڵاتانی سووریا، ئەفغانستان، تورکیا، مەغریب و پاکستانن. 

ئەوەی پێویستە بیزانیت: لە ساڵێ 2015 ەوە نزیکەی یەک ملیۆن کۆچبەر ڕێگای سربیایان بۆ کۆچکردن بەرەو ئەوروپا بەکارهێناوە، تەنیا لە نیوەی یەکەمی ئەمساڵیشدا 10 هەزار و 389 کەس بە نایاسایی چوونەتە سڕبیا، ئەم ژمارەیە بەراورد بە ساڵی ڕابردوو بە ڕێژەی 70٪ کەمیکردووە.