لیرەی تورکی ڕیکۆردێکی دیکەی لە دابەزین تۆمار کرد

ئاڤا نیوز 

لیرەی تورکی بەردەوامە لە دابەزین و ئێستا یەک دۆلار بەرامبەر بە 34 لیرەی تورکییە. گرنگترین ھۆکاریش دەگەرێتەوە بۆ زیادبوونی خواستی ناوخۆ لەسەر دراوی بیانی.

وێنە گەورەکە: ئەمرۆ ھەینی، بەھای لیرەی تورکی گەیشتە نزمترین ئاستی مێژوویی و یەک دۆلار بەرامبەر 34 لیرە مامەڵەی پێوەدەکرێت. تەنیا لە مانگی ئاب، لیرەی تورکی بەرامبەر بە دۆلاری ئەمریکی 2.6%ی  بەھاکەی، لە سەرەتای ساڵەوە تاوەکو ئێستا 15% و لە 12 مانگی ڕابردوو 25%ی بەھاکەی لەدەستداوە. بۆ یەکەمجاریشە لە مێژووی خۆی بەھای لیرەی تورکی بۆ ھەر 100 دۆلارێک بگاتە 3400 لیرە.

ھۆکارە زانراوەکان: شارەزایان دەڵێن، زیادبوونی خواستی ناوخۆ لەسەر دراوی بیانی، بەتایبەت دۆلار و یۆرۆ، ھۆکارن بۆ ئەم دابەزینە خێرایە. ئەمە لەکاتێکدایە، تادێت دەنگۆکانی دابەزاندنی رێژەی سوود لەلایەن بانکی ناوەندیی تورکیا زیاتر دەبن، ئەمەش رەنگە کاریگەرییەکان زیاتر بکات.

ئەمەش بزانە: ئێستا فاتیح قەرەھان، سەرۆکی بانکی ناوەندیی تورکیا، لە ئەمریکایە بۆ بەشداریکردن لە سیمپۆزیۆمی جاکسن ھۆل کە لەلایەن بانکی ناوەندیی ئەمریکا ساڵانە بۆ بەرپرسانی بانکە ناوەندییەکان ڕێک دەخرێت.