عێراق بەرزترین ئاستی چاودێرییکردنی ئاوڵەی مەیموون ڕادەگەیێنێت

ئاڤا نیوز 

وەزارەتی کشتوکاڵی عێراق، بەرزترین ئاستی لێکۆڵینەوە و چاودێریی نەخۆشی ئاوڵەی مەیموون ڕادەگەیێنێت، لە ئەگەری مەترسیی بڵاوبوونەوەی نەخۆشییەکە لە عێراق.

وێنە گەورەکە: لەپێناو ڕێگریکردن لە بڵاوبوونەوەی نەخۆشیی ئاوڵەی مەیموون وڵاتان ڕێکاری تووند دەگرنەبەر، حکومەتی عێراقیش بەرزترین ئاستی چاودێریکردنی نەخۆشییەکەی ڕاگەیاندووە و کەوتووەتە ئامادەباشییەوە.

ڕاگەیێنراوی فەرمی: بەڕێوەبەرایەتیی ڤێتێرنەریی وەزارەتی کشتوکاڵی عێراق، نەخۆشخانە و کلینیکەکانی ڤێتێرنەری لە هەموو پارێزگاکان ئاڕاستەکردووە، بۆ بەرزکردنەوەی زۆرترین ئاستی چاودێری و لێکۆڵینەوە لە نەخۆشی ئاوڵەی مەیموون، لە باخچەی ئاژەڵان و ئەو شوێنانەی ئاژەڵ دەفرۆشن.

زانیاریی زیاتر: ئەم ڕێکارەی حکومەتی عێراق دوای ئەوە دێت، نەخۆشییەکە لە چەند وڵاتێکی  ئەفریقیا، ئاسیا و ئەوروپا تۆمار کرا.

ئەوەی پێویستە بیزانیت: لە عێراق هیچ تووشبوویەک بە نەخۆشی ئاوڵەی مەیموون تۆمار نەکراوە، بەڵام لەگەڵ هاتنی زیارەتکاران لە سەرتاسەری جیهان بۆ عێراق مەترسیی بڵاوبوونەوەی زیاتر دەکات.