جیرۆم پاوڵ کاتی رێکخستنەوەی سیاسەتی دراوی ڕاگەیاند

ئاڤا نیوز 

سەرۆكی بانكی ناوەندیی ئەمریكا ڕایدەگەیێنێت كاتی ڕێكخستنەوەی سیاسەتی نەختینەی دراوە.

لێدوانی فەرمی: جیرۆم پاوڵ، سەرۆکی بانکی ناوەندیی ئەمریکا (فێد)، لە سیمپۆزیۆمی جاکسن ھۆڵ لە ئەمریکا، ڕایگەیاند: نزیکبووینەتەوە لە ڕێکخستنەوەی سیاسەتی نەختینەی دراو، ئامارەکانی داھاتوو بڕ و خێرایی کەمکردنەوەی ڕێژەی سوود دیاری دەکەن. 

بۆچوونی شارەزایان: کلاودیا ساھم، ئابووریناسی پێشووی بانکی ناوەندی ئەمریکا، لە لێدوانێکیدا بۆ بلوومبێرگ گوتی: لە مانگی ئەیلولی ئەمساڵ، پێشبینی 50 خاڵ دابەزین لە ڕێژەی سووی بانکی دەکات لە ئەمریکا. ھەروەھا ڕافایل بۆستیک، سەرۆکی بانکی یەدەگی فیدڕاڵی ئەتلانتا، بە بلوومبێرگی گوت: ڕەنگە تا کۆتایی ئەم ساڵ فێد زیاتر لە جارێک پێویستی بە کەمکردنەوەی رێژەی سوود ھەبێت.

ئەوەی پێویستە بیزانیت: جاکسن ھۆڵ، سیمپۆزیۆمێکی ساڵانەیە لە ئەمریکا بە بەشداری سەرۆک و بەرپرسانی بانکی ناوەندیی وڵاتە پێشکەووتوو و تازە پێشکەوتووەکان لە دۆڵی جاکسن ھۆڵ ڕێک دەخرێت، گرنگترین کێشە ھەنووکەییە داراییەکان دەخرێنە بەرباس و ھەوڵی چارەسەرکردنیان دەدرێت.

زانیاریی زیاتر: ئەمساڵ "ڕێکخستنەوەی سیاسەتی دراوەکان" تەوەری سەرەکی کۆبوونەوەکان دەبێت.