لە ڕۆژێكدا 15 هەزار گەشتیار بەشدارییان لە فێستیڤاڵی هەنجیری تەق تەق کردووە

ئاڤا نیوز  

بەگوێرەی ئامارێک، لەیەکەم ڕۆژی فێستیڤاڵی هەنجیری تەق تەق، زیاتر لە 15 هەزار گەشتیاری ناوخۆیی و شارەکانی ناوەڕاست و خوارووی عێراق هاتوونەتە فێستیڤاڵەکە.

وێنە گەورەکە: سێ ساڵە لە ناحیەی تەق تەق فێستیڤاڵی هەنجیر ڕێکدەخرێت و بەرهەمە جیاوازەکانی ناوچەکەی لێ نمایش دەکرێت.

لێدوانی فەرمی: حاجی سەباح، بەڕێوەبەری کشتوکاڵی تەق تەق بە ئاڤا نیوزی ڕاگەیاند: فێستیڤاڵەکە بۆ دوو ڕۆژە، لەڕۆژی یەکەم ژمارەیەکی زۆری گەشتیاری شارەکانی ناوەڕاست و خوارووی عێراق هاتبوون، 80 جووتیاری ناحیەکە و شارەکانی دیکەی وەک قەڵادزێ و ڕاپەڕین بەشدارییان کردبوو، لەگەڵ ئەوەدا 50 ژن وەک خاوەنی کاری تایبەت بەرهەمەکانیان نمایش کردبوو.

زانیاریی زیاتر: بەڕێوەبەری کشتوکاڵی تەق تەق دەڵێت: ئەگەرچی فێستیڤاڵەکە بەناوی هەنجیرە، بەڵام بەشێکی زۆری جووتیارەکان بەرهەمی سەوزەی جیاوازی لێ دەفرۆشن.

باکگراوند: ناحیەی تەق تەق دەکەوێتە سەر زێی بچووک، سەربە قەزای کۆیەیە، 58 کیلۆمەتر لە هەولێرەوە دوورە.