لە هەولێر کۆنفرانسێکی نێودەوڵەتی لەبارەی جینۆسایدی کوردانی ئێزدی ڕێکدەخرێت

ئاڤا نیوز

لە هەولێر کۆنفرانسی وەڵامدانەوەی نێودەوڵەتی بۆ جینۆسایدی کوردانی ئێزدی و تاوانەکانی دژی مرۆڤایەتی ڕێکدەخرێت.

وێنە گەورەکە: بە پاڵپشتی حکومەتی هەرێمی کوردستان، ڕێکخراوی چاودێریی دادپەروەریی باکوور (NJW) بە هەماهەنگی لەگەڵ زانکۆی سەڵاحەدین، ڕێکخراوی بیابانی سەوز و ڕێکخراوی ڕابە، ناوەڕاستی مانگی داهاتوو کۆنفرانسێکی نێودەوڵەتی ڕێکدەخرێت و کۆمەڵکوژی کوردانی ئێزدی و هۆشیاریی جیهانی سەبارەت بە گرفت و کێشەکانیان دەخرێتەڕوو.

لێدوانی فەرمی: ئاڤان جاف، یەکێک لە ڕێکخەرانی کۆنفرانسەکە بە ئاڤا نیوزی گوت، "یەکێک لە ئامانجە گرنگەکانی کۆنفرانسەکە ئاگادارکردنەوەی کۆمەڵگەی نێودەوڵەتییە بەوردی، سەبارەت بەو دڕندەییانەی دەرهەق بە ئێزیدییەکان کراوە، لەگەڵ یەکخستنی هەوڵەکانە بۆ دۆزینەوە و یەکخستنی خێزانەکان."

باکگراوند: 10 ساڵ پێش ئێستا و دورست لە 3-8-2014، ڕێکخراوی داعش هێرشی کردە سەر شنگال و دەوروبەری، سەدان پیاوی کۆمەڵکوژ کران و زیاتر لە شەش هەزار ژن و منداڵیش ڕفێنران، تاوەکو ئێستاش چارەنووسی نزیکەی دوو هەزار و 500 یان نادیارە.

ئەمەش بزانە: ئەمساڵ پرۆژەی پێشکەشکردنی هاوکاریی دارایی بەسەر ڕزگاربووانی دەستی داعش لەلایەن سەرۆکوەزیران مەسرور بارزانی ڕاگەیێنرا و مانگانە هاوکاریی دارایی بە سێ هەزار و 575 هاووڵاتیی کوردی ئێزدی دەدرێت.