میت کوشتنی بەرپرسێکی پەکەکەی لە ڕۆژئاوای کوردستان ڕاگەیاند

ئاڤا نیوز 

 

دەزگای هەواڵگیریی تورکیا ناسراو بە (میت) کوشتنی بەرپرسی لۆجیستی و دارایی پەکەکە لە ڕۆژئاوای کوردستان ڕاگەیاند و دەڵێت، ماوەیەکی درێژ بوو چاودێریان دەکرد.

 

چیرۆکی سەرەکی: میدیاکانی تورکیا لە سەرچاوە ئەمنییەکانی ئەو وڵاتە هەواڵی کوشتنی عەبدولحەمید گاباری ناسراو بە (تەکین گویی) لەلایەن میتەوە بڵاوکردووەتەوە و ئاماژە بەوە دەکەن، ئەو بەرپرسەی پەکەکە لە شاری قامیشلۆی ڕۆژئاوای کوردستان کراوەتە ئامانج.

 

زانیاریی زیاتر: عەبدولحەمید گاباری لە ساڵی 1992 چووەتە ڕیزەکانی پەکەکەوە و لە ساڵی 2018 چووەتە ڕۆژئاوای کوردستان و بەرپرسی لۆجستی و دارایی ڕێکخراوەکە بوو، لە لیستی داواکراوەکانی وەزارەتی ناوخۆی تورکیادا بووە.

 

ئەوەی پێویستە بیزانیت: ڕۆژی 22ـی ئەم مانگە فڕۆکەی بێفڕۆکەوانی تورکیا بۆردوومانی ئامانجێکی لە ناوەندی شاری قامیشلۆی ڕۆژئاوای کوردستان کرد، بەبێ ئەوەی ئامانجەکە ئاشکرا بکرێت.

 

باکگراوند: لە سەرەتای ئەمساڵەوە فڕۆکە بێفڕۆکەوانەکانی تورکیا 92 هێرشیان بۆ سەر ناوچەکانی ژێر دەسەڵاتی ئیدارەی خۆسەر لە ڕۆژئاوای کوردستان ئەنجامداوە، بەهۆیانەوە 29 کەس گیانیان لەدەست داوە، زیاتر لە 27 کارمەندی سەربازی و 16 کەسی مەدەنیش بریندار بوون.