کوردێکی سوننە دەبێتە جێگری سەرۆککۆماری ئێران

ئاڤا نیوز

مەسعود پزیشکیان، سەرۆککۆماری ئێران، بە فەرمانێک عەبدولکەریم حوسێنزادە، پەرلەمانتاری کوردی سوننی، وەک جێگری خۆی بۆ کاروباری "گەشەپێدانی گوند و ناوچە بێبەشکراوەکانی وڵات" دانا.

وێنە گەورەکە: پزیشکیان بەڵێنی دابوو سوود لە تەواوی توانا و لێهاتووییەکانی وڵات وەربگرێت و حکومەتێکی "هاوپەیمانیی نیشتیمانی" پێکبهێنێت. بۆیە چاوەڕێ دەکرا لە ناو وەزیرەکاندا کەسانی کورد و سوننە هەبن، بەڵام هیچ کام لە وەزیرەکان لەوانە نەبوون، ئەمەش ناڕەزایی لای سوننە و کورد دروست کرد.

قووڵتر: حوسێنزادە دەبێتە یەکەمین ئەندامی سوننی کابینەکەی حکومەتەکانی کۆماری ئیسلامیی ئێران و بەرزترین پۆستە کە تا ئێستا سوننەکان لە ئێران وەریانگرتبێت.

زانیاریی زیاتر: حوسێنزادە خەڵکی نەغەدەیە، نوێنەری شارەکانی نەغەدە و شنۆی  ڕۆژهەڵاتی کوردستان و ئەندامی لیژنەی ئاوەدانیی پەرلەمانی ئێران بوو. 

ئەوەی پێویستە بیزانیت: پزیشکیان لە فەرمانی دانانی حوسێنزادەدا نووسیویەتی: بەهۆی پابەندی و ئەزموونە بەنرخەکانی بۆ ئەو پۆستە هەڵبژاردووە.