دابەشکردنی ئاوی پاک لە قەڵادزێ دەستیپێکردەوە

ئاڤا نیوز

دوای 24 کاتژمێر لە وەستانی پڕۆسەکە، دابەشکردنی ئاو بەسەر دانیشتووانی قەڵادزێ دەستیپێکردەوە. بەربەستێک بەدرێژایی 120 مەتر لەبەردەم زێی بچووک دروستکراوە و بەشی یەک ساڵ ئاو گلدراوەتەوە.

وێنە گەورەکە:  بەشێک لە سەرچاوەی ئاوی زێی بچووک دەکەوێتە ڕۆژهەڵاتی کوردستان، ساڵانە لەگەڵ نزیکبوونەوەی وەرزی پاییز و کەمبوونەوەی ئاو، ئێران دەیگرێتەوە و بۆ بەنداوی ورمێ بەکاری دەهێنێت، بەمەش ئاوی زێی بچووک زۆر کەمدەکات و گرفت بۆ خەڵکی قەڵادزێ دروست دەبێت.

ئەوەی پێویستە  بیزانیت: پڕۆژەی ئاوی خاس بۆ دابینکردنی ئاوی پاک بۆ 95 هەزار دانیشتووی قەڵادزێ لەسەر زێی بچووک دروست کراوە، کاتێک ئێران ئاو دەگرێتەوە ئاوی زێ کەمدەکات و ناگاتە پەمپەکانی پرۆژەکە.

 

لێدوانی فەرمی: مارف مەحموود، بەڕێوەبەری پڕۆژەی ئاوی خاس بە ئاڤا نیوزی گوت، "لە کاتژمێر 04:00ی بەرەبەیانی ئەمڕۆ سێشەممە دابەشکردنی ئاو بەسەر هاوبەشانی قەڵادزێ دەستی پێکردووەتەوە، بەربەستێکی 120 مەتر درێژ و 12 مەتر پان لەبەردەم ئاوەکە دانراوە و بەشی یەک ساڵی دیکە ئاومان گلداوەتەوە".

ئەمەش بزانە: ئێران لە نزیک بەنداوی کانی سێو لە دیوی ڕۆژهەڵاتی کوردستان، بە درێژایی 37 کیلۆمەتر بە بۆڕی ڕێرەوی بەشێکی ئاوی زێی بچووکی گۆڕیوە و بۆ بەنداوی ورمێی بردووە، بۆ ئەوەی وشک نەبێت.