ئەمساڵ نزیکەی شەش ملیار مەتر سێجا ئاو گلدراوەتەوە

ئاڤا نیوز

 

لە بەنداوەکانی هەرێمی کوردستان بەهۆی زۆری دابارینەوە لەمساڵدا زیاتر لە یەک ملیار و نیو ئاو بەراورد بە ساڵی ڕابردوو ئاو گلدراوەتەوە.

 

وێنە گەورەکە: لە هەرێمی کوردستان، سێ بەنداوی گەورە و زیاتر لە 15 بەنداوەی بچووک هەن، توانای گلدانەوەی زیاتر 10 ملیار ‏مەتر سێجا ئاویان هەیە، هۆکارن بۆ پەرەدان بە سامانی ئاژەڵی و کوشتوکاڵی، ڕێگیریکردن لە وشکەساڵی و کەمکردنەوەی کاریگەرییەکانی لافاو.

لێدوانی فەرمی: ڕەحمان خانی، بەڕێوەبەری گشتیی بەنداوەکانی هەرێمی کوردستان بە ئاڤا نیوزی گوت: "ئەمساڵ پێنج ملیار و 900 ملیۆن مەتر سێجا ئاوی گلدراوەتەوە لە هەرێمی کوردستان بەراورد بە ساڵی ڕابردوو زیاتر لە ملیارێک و 500 ملیۆن مەتر سێجا زیادبووە".

ژمارەکان وادەڵێن: سێ بەنداوی گەورە لە هەرێمی کوردستان هەن، بەهۆی گەورەیی قەبارەیان زیاتر لەوانی دیکە پشتیان پێدەبەسترێت، کە پێکهاتوون لە بەنداوی دووکان کە 950 ملیۆن مەتر سێجا، بەنداوی دەربەندیخان 400 ملیۆن مەتر سێجا و بەنداوی دهۆک 25 ملیۆن مەتر سێجا زیاتر لە ساڵی ڕابردوو ئاوی تیادا گلدراوەتەوە.

ئەوەی پێویستە بیزانیت: لە ماوەی کارکردنی کابینەی نۆیەم، شەش بەنداو کە پێکهاتوون لە، چەمرگە، خنس، ئاقوبان، دێوانە، توڕەجار و شەوگێڕ تەواوکراون و کۆتایی ئەمساڵ بەنداوەکانی گۆمەسپان و بەستۆڕەش کارەکانیان تەواو دەبێت.