لە توركیا لەبری لیرە خانوو بە زێڕ بەكرێ دەدرێ

ئاڤا نیوز 

دوای بڕیاری بە ئەیلیکترۆنیکردنی گرێبەستەکانی خانووبەرە و دانانی لە وێبسایتی ئەلیکترۆنی دەوڵەت، لە تورکیا خاوەن موڵکەکان پەنا دەبەنە بەر بەکرێدانی موڵکەکانیان بە زێڕ، تەنانەت لە گرێبەستەکانیشدا لەبری دراوی لیرەی تورکی زێڕ دیاری دەکرێت. 

ڕاگەیێنراوی فەرمی: وەزارەتی دارایی و خەزێنەی تورکیا رایگەیاند: دیاریکردنی کرێی خانوو بە زێڕ پێشێلکردنی یاساکانە، لەم چوارچێوەیەدا گرنگە، هەمووان دووربن لە هەر هەنگاوێکی نایاسایی کە ببێتە هۆی پێشێلکردنی مافی هاوڵاتییان. هەروەها هەموو جۆرە کڕین و فرۆشتنێک دبێت بە پارە یان پێنوێنێک دیاری بکرێت کە بە پارە پاڵپشتی لێوە دەکرێت.

هۆکارە زانراوەکان: دابەزینی بەهای لیرەی تورکی بەشێوەیەکی بەردەوام و بریاری حکومەت بۆ خاوەن موڵکەکان بۆ دانانی کۆپییەک لە رێککەوتنەکان لە سیستەمی حکومەت (ئێ-دەڤلەت) خاوەن موڵکەکانی ناچار کردووە پەنا ببەنە بەر بەکارهێنانی زێر لەبری دراوی نیشتیمانی.

وێنە گەورەكە: حکومەتی تورکیا "بەمەبەستی ڕێگریکردن لە بەرزبوونەوەی نرخەکان، پێشێلکردنی مافی خاوەن موڵک و کرێچییەکان، زیادکردنی داهاتی باج و زیادکردنی شەفافیەت لە خستنەرووی داهاتەکان" بریاریدا تاساڵی سەرەتای ساڵی 2025 هەموو گرێبەستەکانی بەکرێدان و کرێن و فرۆشتنی خانوو و زەوی بکرێتە ئەلیکترۆنی و لە وێبسایتی حکومەت دابنرێت.