وەزارەتی نەوتی عێراق  نوێترین ئاماری هەناردەی نەوت بڵاودەكاتەوە

ئاڤا نیوز

عێراق لە ماوەی یەک مانگدا 108 ملیۆن بەرمیل نەوتی فرۆشتووە.

وێنە گەورەكە: وەزارەتی نەوتی عێراق مانگانە کۆی هەناردەی نەوت لە سەرجەم كیڵگە نەوتییەكانی ئاشكرا دەكات، رێژەی هەناردەی مانگی تەمموزیش لەبەرزترین ئاستدا بووە.

ڕاگەیێنراوی فەرمی: وەزارەتی نەوتی عێراق ڕایگەیاند: کۆی هەناردەی مانگی تەمموز لە ڕێگەی کۆمپانیای بەبازاڕکردنی نەوتی عێراق ( سۆمۆ) ـوە ، 108 ملیۆن و 53 هەزار و 356 بەرمیل نەوت بووە.

ژمارەکان وا دەڵێن: بڕی 106 ملیۆن و 125 هەزار و 200 بەرمیل نەوتی خام لە کێڵگە نەوتییەکانی ناوەڕاست و باشووری عێراقەوە هەناردە کراوە، هەناردەی گەیارەش یەك ملیۆن و 928 هەزار و 156 بەرمیل بووە.

باكگراوند: کۆی هەناردەی مانگی حوزەیرانی ڕابردوو ، 102 ملیۆن و 314 هەزار و 548 بەرمیل نەوت بووە، بەمەش سۆمۆ لەمانگی تەمموزدا پێنج ملیۆن و 738 هەزار و 808 بەرمیل نەوتی زیاتر هەناردەكردووە.