کۆمپانیایەکی هەرێمی کوردستان مۆڵەتی کارکردنی لە کێڵگە نەوتییەکانی عێراق پێدرا

ئاڤا نیوز

 

ئەنجومەنی وەزیرانی عێراق، گەڕی پێنجەم و شەشەمی مۆڵەتپێدانی کۆمپانیاکانی پەسەندکرد.

 

چیرۆکی سەرەکی: لە چوارچێوەی پەرەپێدانی کەرتی نەوتی کە حکومەتی عێراق پلانی بۆ داڕشتووە، ئەنجوومەنی وەزیران لە کۆبوونەوەی ئاساییدا، گەڕی مۆڵەتپێدانی پێنجەمی 'تەواوکاری' و شەشەمی پەسەندکرد.

 

وێنە گەورەکە: ئەو بەشەی تەواونەکراوە لە گەڕی مۆڵەتپێدانی پێنجەم و گەڕی مۆڵەتپێدانی شەشەم 14 پڕۆژە لە خۆدەگرێت و پێویستیان بە واژۆی کۆتایی هەیە بۆ ئەنجامدانی گرێبەست، دوای ئەوە راستەوخۆ دەست بە کارکردن دەکرێت. 

 

باکگراوند: 11ـی ئایاری ئەمساڵ، چالاکی گەڕی مۆڵەتپیدانی بەشی پێنجەم و شەشەم لە بەغدا بەڕێوەچوو، تێیدا 29 پڕۆژەی تایبەت بە بەدواداگەڕانی نەوت و گاز خرانەڕوو، کە بەسەر 12 پارێزگا دابەشکراون. 

 

زانیاری زیاتر: لە چالاکییەکەی مانگی ئایاری رابردوودا، کۆمپانیای 'کار' دوو گرێبەستی بەدەستهێنا کە، 'پەرەپێدانی کێڵگەی ئەلدیمە لە میسان و هەردوو کێڵگەی عەلان و ساسان لە پارێزگای نەینەوا'. کۆمپانیای ZEPCـی چینی دوو گرێبەستی بەدەستهێنا، 'پەرەپێدانی کێڵگەی رۆژهەڵاتی بەغدا و کێڵگەکانی فوراتی ناوەڕاست'. هەروەها کۆمپانیاکانی UEG و ژێنهوا و چەند کۆمپانیایەکی دیکە گرێبەستی کێلگەکانی دیکەیان بەدەستهێنا. 

بابەتە ستراتیژییەکان: ئەوەی گرنگە کۆمپانیای کار وەک یەکەم کۆمپانیای کوردستان بۆ یەکەمجار گرێبەستی پەرەپێدانی کێڵگەکانی باشوور و ناوەڕاستی عێراقی بەدەستهێنا، ئەو کۆمپانیایە بە فەرمی لەلایەن وەزارەتی نەوتی عێراق و حکومەتی عێراق ڕەزامەندی کارکردنی پێدراوە.