عێراق هەناردەی ملیۆنان بەرمیل نەوت ڕادەگرێت

ئاڤا نیوز

 

بەمەبەستی پابەندبوون بە بڕیارەکانی OPEC، عێراق هەناردەی ملیۆنێک بەرمیل نەوت ڕادەگرێت، دوو باری دیکە فرۆشی نەوتیش بە هەمان قەبارە بۆ مانگی داهاتوو ڕادەگرێت. 

 

چیرۆکی سەرەکی: بە مەبەستی پابەندبوون بە رێککەوتنی ئۆپێک پڵەس، عێراق قەرەبووی ئەو زیادە بەرهەمهێنانە دەکاتەوە، کە لە دەستپێکی ئەمساڵەوە پێشێلی رێککەوتنی کردووە و نەوتی زیاتری بەرهەمهێناوە. بەمەش ئاستی بەرهەمهێنان بۆ 3.85 تاوەکو 3.9 ملیۆن بەرمیل نەوتی رۆژانە کەمدەکاتەوە.

 

وێنە گەورەکە: بە گوێرەی راپۆرتێکی ئاژانسی رۆیتەرز، عێراق لە مانگی تەممووزی رابردوودا رۆژانە 4.25 ملیۆن بەرمیل نەوتی بەرهەمهێناوە، کە ئەمەش زیاترە لەو ئاستەی بۆی دیاریکراوە، بۆیە پلانێکی پێشکەش بە رێکخراوی ئۆپێک کردووە، کە لەم مانگە و لە مانگی ئەیلوولی داهاتوو قەرەبووی ئەو زیاد بەرهەمهێنانە بکاتەوە. 

 

رێککەوتنەکە بەم شێوەیە: سەرچاوەیەک بۆ رۆیتەرز رایانگەیاندووە، لە مانگی ئەیلوولی داهاتوو، بەغدا هەناردەی نەوت بۆ 3.3 ملیۆن بەرمیل نەوتی رۆژانە کەمدەکاتەوە، هەروەها بەکاربردنی ناوخۆیش لە 570 هەزار بەرمیل نەوتی رۆژانەوە بۆ 500 هەزار بەرمیل نەوتی رۆژانە کەمدەکاتەوە، داواش لە حکومەتی هەرێمی کوردستان کراوە، بەرهەمهێنان لە 150 هەزار بەرمیل نەوتی رۆژانە بۆ 50 هەزار بەرمیل نەوتی رۆژانە کەمبکاتەوە. 

 

باکگراوند: 28ـی ئەم مانگە، سکرتێری رێکخراوی ئۆپێک سەردانی بەغدای کرد. ئامانج لە سەردانەکەی تاوتوێکردنی پێشێلکاری عێراق بوو، کە لە سەرەتای ئەمساڵەوە رۆژانە نزیکەی 1.4 ملیۆن بەرمیل نەوتی زیاتری بەرهەمهێناوە.