خەیری بۆزانی: ئاستەنگ بۆ دۆزینەوەی ڕفێراوانی ئێزدی دروست دەکرێت

ئاڤا نیوز  

سەرپەرشتیاری دۆسیەی ڕزگارکردنی ڕفێنراوانی ئێزدی دەڵێت، بۆ دۆزینەوەی ئەو ئێزدییانەی بێسەروشوێن کراون، گرفتیان بۆ دروست دەکرێت.

وێنە گەورەکە: ڕێکخراوی نەتەوە یەکگرتووەکان، ڕۆژی 30 ئابی هەموو ساڵێکی وەک ڕۆژی جیهانی بێسەروشوێنان دیاریکردووە و تائێستا ژمارەیەكی زۆر ئێزدی بێسەروشوێنن.

لێدوانی فەرمی: خەیری بۆزانی، سەرپەرشتیاری دۆسیەی ڕزگارکردنی ڕفێندراوانی ئێزدی بە ئاڤا نیوزی گوت: بەگوێرەی بەدواداچوونی ئێمە ژمارەیەکی زۆری ئەو ژنە  ئێزدییانەی چەکدارانی داعش ڕفاندوونی ئێستا لە کەمپی "هۆل"ن لە ڕۆژئاوای کوردستان، بەڵام دەسەڵاتی بەڕێوەبردنی ڕۆژئاوا جگە لەوەی بۆ دۆزینەوەیان هیچ ئاسانکارییەکمان بۆ ناکەن، لە هەمان کاتدا کێشەمان بۆ دروست دەکەن.

ژمارەکان وا دەڵێن: ئاماری نوسینگەی ڕزگاربووانی دەستی داعش دەریدەخات، ئەو کاتەی چەکدارانی داعش شنگال و گوندەکانی دەورووبەریان داگیرکرد، شەش هەزار و 417 ژن و پیاویان ڕفاند، لەو ژمارەیە سێ هەزار و 548 کەسیان ژن و کچ بوون. توانرا سێ هەزار و 579 ژن و پیاو و منداڵ ڕزگار بکرێن.

ئەوەی پێویستە بیزانیت: دوای 10 ساڵ، هێشتا دوو هەزار و 596 ژن و پیاوی ئێزدی ڕفێنراو چارەنووسیان نادیارە، لەو ژمارەیە هەزار و 233 کەسیان ژن و هەزار و 363 کەسیان پیاون.