ئەمڕۆ وەزیر و پەرلەمانتارانی کورد لە بەغدا لەبارەی پرسی مووچە کۆدەبنەوە

ئاڤا نیوز

پرسی مووچەخۆرانی هەرێمی کوردستان، وەزیر و پەرلەمانتارانی کورد کۆدەکاتەوە و  هەڵوەستە لەسەر چارەسەرەکانی دەکەن.

وێنە گەورەکە: بەهۆی بوونی تێبینی لەسەر لیستەکان لەلایەن وەزارەتی دارایی عێراق، زیاتر لە 50 ڕۆژە مووچەخۆرانی هەرێمی کوردستان مووچەیان وەرنەگرتووە، هەفتەی ڕابردوو شاخەوان عەبدوڵڵا، جێگری سەرۆکی پەرلەمانی عێراق بانگەوازی بۆ نوێنەرانی کورد لە بەغدا کرد کۆببنەوە و  چارەسەرێک بۆ کێشەکە بدۆزنەوە.

 

لێدوانی فەرمی: خالید شوانی، وەزیری دادی عێراق ئەمڕۆ سەردانی کرد کەرکووکی لە لێدوانێکی تایبەتدا بە ئاڤا نیوزی ڕاگەیاند،  "ئێوارەی ئەمڕۆ لە بەغدا نوێنەرانی هەرێمی کوردستان  (وەزیرانی کورد و فراکسیۆنە کوردستانییەکان) لەبارەی پرسی مووچە کۆدەبنەوە و هەڵوەستە لەسەر چارەسەری یەکجاری ئەو پرسە دەکەن."

ئەوەی پێویستە بیزانیت: لەکاتێکدا ئێستا مانگی نۆیە، تاوەکو ئێستا حکومەتی عێراق مووچەی مانگی حەوتیشی بەتەواوی نەناردووە، بەجۆرێک بۆ مووچەی مانگەکانی حەوت و هەشت تائێستا بە چەند گوژمەیەک بڕی 819 ملیار دیناری خستووەتە سەر هەژماری بانکی هەرێمی کوردستان، لەکاتێکدا حکومەتی هەرێمی کوردستان بۆ مووچەی هەر مانگێک پێویستی بە زیاتر لە 950 ملیار دینارە.