پەیامێکی تووند لە ئەردۆغانەوە بۆ یەکێتی: گۆشەگیرتان دەکەین

ئاڤا نیوز

 

سەرۆککۆماری تورکیا، یەکێتیی نیشتمانیی کوردستان بە "پاڵپشتیکاری تیرۆر"، ناودەبات و دەڵێت "دەرگاکانی لێبووردەیی داخراون".

 

لێدوانی فەرمی: رەجەب تەییب ئەردۆغان، سەرۆککۆماری تورکیا پەیامێکی لەبارەی پاڵپشتیی یەکێتیی نیشتمانیی کوردستان بۆ پارتی کرێکارانی کوردستان لە سلێمانی، کە ئەو بە "تیرۆر" ناوی دەبات نارد و دەڵێت: "هۆشدارییمان داوەتە یەکێتی، کە ئەگەر لە پاڵپشتییەکانیان بۆ تیرۆر بەردەوام بن، ئەوا هەنگاوی کاریگەرتر دەگرینەبەر و گۆشەگیریان دەکەین و تەنیا دەیانهێڵینەوە".

 

زانیاریی زیاتر: لە پەیامەکەیدا، سەرۆککۆماری تورکیا وا پێشاندەدات، کە ئامادە نین هیچ گفتوگۆیەک لەو بارەیەوە بکەن و دەڵێت: "دەرگاکانی لێبووردەیی داخراو دەبن تاوەکو کۆتایی، ئەگەر پەیوەندیی بە ئاسایشی نیشتمانیی و نەتەوەییمانەوە هەبێت. هەر کارێک پێویست بێت بۆ ڕێگریی لەو کارە دەیکەین".

 

سەرچاوەی لێدوانەکە: رەجەب تەییب ئەردۆغان لە دوو ڕۆژی ڕابردوودا، سەردانی هەردوو وڵاتی ئیمارات و میسری کرد، لە کاتی گەڕانەوەی لەنێو فڕۆکە تایبەتەکەی کە ئەمڕۆ بڵاوکراوەتەوە، لە وەڵامی پرسیاری ڕۆژنامەنووسان ئەو پەیامەی دا.

 

لەلایەکی دیکەوە: سەرۆککۆماری تورکیا هاوکات لەگەڵ ئەو پەیامەی بۆ یەکێتی، پەسنی پەیوەندییەکانی وڵاتەکەی لەگەڵ حکومەتی هەرێمی کوردستان و حکومەتی عێراق دەکات و سەردانی وەزیری بەرگریی وڵاتەکەی بۆ بەغدا و هەولێر بە ئەرێنی وەسفکرد.