تورکیا: هیچ کەسێک بەهۆی قسەکردن بە زمانی کوردی نەکوژراوە

ئاڤا نیوز 

ناوەندی بەرەنگاربوونەوەی زانیاری ناڕاست لە سەرۆکایەتیی کۆماری تورکیا، ڕەتیدەکاتەوە حەکیم لوقمان، ئەو بازرگانە کوردەی لە ئیستەنبووڵ بە چەقۆ کوژرا، بەهۆی قسەکردن بە زمانی کوردییەوە کوژرابێت، بە هەوڵێک بۆ دروستکردنی ڕق و دوژمنایەتی ناوی دەبات.

 

بۆچی گرنگە: دوای کوژرانی حەکیم لوقمان، بازرگانی کورد دەنگۆی ئەوە بڵاوکرایەوە کە بەهۆی قسەکردن بە زمانی کوردی کوژراوە.

 

ڕاگەیێنراوی فەرمی: بەگوێرەی ناوەندی بەرەنگاربوونەوەی زانیاری ناڕاست لە سەرۆکایەتیی کۆماری تورکیا دوای لێکۆڵینەوە لە ڕووداوەکە، دەرکەوتووە، حەکیم لوقمان لە شوێنێکی مەیخواردنەوە لە قەزای فاتیح لەگەڵ دوو لە هاوڕێکەی لەسەر “سەیرکردنی ئافرەت” دەبێت بە دەمەقاڵییان دواتر بە چەقۆ هێرش دەکەنە سەر حەکیم لوقمان و بەسەختی برینداری دەکەن.

 

زانیاریی زیاتر: بەپێی ڕاگەیێنراوەکە تۆمەتبارەکان هەڵاتوون و لێکۆڵینەوە لە ڕووداوەکە بەردەوامە. جەختی کردووەتەوە کە ئەو کەسانەی لە سۆشیال میدیا ئەو جۆرە هەواڵانە بڵاودەکەنەوە، ئامانجیان هاندانی خەڵکە بۆ ڕق و دوژمنایەتی.

 

باکگراوند: حەکیم لوقمان، تەمەن 45، بازرگانێکی کوردە و خەڵکی شاری دهۆکە، دوێنێ لە شاری ئیستەنبووڵ 12 کەس بە چەقۆ لێیاندا و بەهۆیەوە گیانی لەدەست دا.