هۆكاری بەرزبوونەوەی داهاتی نانەوتی عێراق ئاشكرابوو

ئاڤا نیوز

 

بەراورد بە ساڵانی ڕابردوو داهاتی نانەوتی عێراق بەڕێژەیەكی زۆر زیادیكردووە، ڕاوێژکارێكی سەرۆکوەزیرانیش هۆكارەكەی ئاشكرادەكات.

لێدوانی فەرمی: مەزهەر محەممەد ساڵح، ڕاوێژکاری سەرۆکی حکومەت بۆ کاروباری دارایی ڕایگەیاند: لە ماوەی شەش مانگی یەكەمی ساڵی 2023 داهاتی نانەوتی عێڕاق نزیکەی 0.42 ترلیۆن دینار بوو، هاوكات لەشەش مانگی یەكەمی ئەمساڵدا بەرزبووەتەوە  بۆ 7.18 تریلیۆن دینار.

خاڵه‌ ئه‌رێنییه‌كان: ساڵح ڕوونی کردەوە ئەم پێشهاتە دوای بڕیارەكانی ئەنجومەنی وەزیرانی عێراق هات سەبارەت بە چاکسازی لە سیستەمی باجی وڵات، بە پشتبەستن بە ئەپڵیکەیشنی دیجیتاڵی لە دەروازە سنوورییەکان و فەرمانگەكانی گومرگ، و دانی باج و ڕسومات بەشێوەیەكی ئەلیکترۆنی.

ژماره‌كان واده‌ڵین: داهاتی باجی سوود و سامان بەڕێژەی 118% بەرزبووەتەوە، داهاتی باجی کاڵا و باجی بەرهەمهێنان بەڕێژەی 285% بەرزبووەتەوە، داهاتی ڕسوماتیش بەڕێژەی 50% بەرزبووەتەوە. 

وێنە گەورەكە: عێراق یەكێكە لەو وڵاتانەی داهاتەكەی زیاتر لە %90 پشتی بە نەوت بەستووە، هەر دابەزین و بەرزبوونەوەیەكی نرخی نەوت كاریگەری لەسەر دروست دەكات.