کێشەی مووچەی فەرمانبەرانی دەرەوەی ئیدارەی هەرێمی کوردستان چارەسەر دەکرێت

ئاڤا نیوز

 

کێشەی مووچەی 21 هەزار مامۆستا و فەرمانبەری ناوچەکانی دەرەوەی ئیدارەی هەرێمی کوردستان چارەسەر دەکرێت، مووچەکانیان لە وەزارەتی دارایی هەرێمی کوردستان وەردەگرن.

وێنە گەورەکە: یەکێک لە تێبینییەکانی وەزارەتی دارایی عێراق، کە هەفتەی ڕابردوو ئاراستەی شاندی هەرێمی کوردستان کراوە، مووچەی فەرمانبەران و مامۆستایانی ناوچەکانی دەرەوەی ئیدارەی هەرێمی کوردستان بوو، داوای ڕوونکردنەوەی لەسەر کراوە.

ئەوەی پێویستە بیزانیت: 21 هەزار مامۆستا فەرمانبەری حکومەتی هەرێمی کوردستان شوێنی ئەرکیان لە کەرکووک، مەخموور، نەینەوا، سەڵاحەددین و دیالەیە، مووچەیان لە پشکی هەرێمی کوردستان بۆ دابین دەکرێت. 

لێدوانی فەرمی: کامەران عەلی، بەرێوەبەری خوێندنی کوردی لەکەرکووک بە ئاڤا نیوزی گوت: "وەزارەتی دارایی عێراق گومانی هەبووە، کە فەرمانبەرانی ناوچەکانی دەرەوەی ئیدارەی هەرێمی کوردستان لە هەولێر و بەغدا مووچەیان هەبێت، بەڵام دوای ناردنی بایۆمترییەکان گرفت بۆ ناردنی مووچەکانمان نەماوە و پارەکەمان بۆ خەرج دەکرێت."

لە لایەکی دیکەوە: ڕۆژی 29-08-2024 شێروان دووبەردانی، ئەندامی لیژنەی هەرێم و پارێزگاکان لە پەرلەمانی عێراق بە ئاڤا نیوزی ڕاگەیاند: لە کۆبوونەوەی شاندی دارایی نێوان هەرێمی کوردستان و عێراق، شاندی هەرێمی کوردستان تیشکیان خستووەتەوە  سەر ئەوەی،  وردبینی  بۆ مووچەی فەرمانبەرانی ناوچەکانی دەرەوەی ئیدارەی هەرێمی کوردستان کراوە و مووچەکانیان خەرج دەکرێت.