ئاماری هەڵاوسان ناکۆکی دەخاتە نێوان ئابووریناسان و حکومەتی توركیا

ئاڤا نیوز 

 

هەڵاوسانی مانگانە لە تورکیا بەرزبووەوە و لەسەر بنەمای ساڵانەش رێژەکە دابەزی بۆ 51.97%، ئابووریناسانیش ناکۆکن لەسەر رێژەکە.

وێنە گەورەکە: دامەزراوەی ئاماری تورکیا، ئەمرۆ سێشەممە، ئاماری هەڵاوسانی مانگی ئابی بڵاوکردەوە، بەپێی ئامارەكە، پێوەرەکانی نرخی بەکاربەر لەسەر ئاستی مانگانە بەڕێژەی  %2.47 بەرزبووەتەوە، هەڵاوسانی ساڵانەش بۆ 51.97% دابەزیوە.

لە لایەکی دیکەوە: بەپێی ئاماری ڕێکخراوی توێژینەوەی سەربەخۆی ئێناگ، لە مانگی ئابدا هەڵاوسان بە ڕێژەی 3.47% زیادیکردووە و بەرزبوونەوەی پێوەرەکانی نرخی بەکاربەر لە 12 مانگی ڕابردوودا نزیکەی 90% بووە.

زانیاریی زیاتر: ئەو ئابووریناسانەی بەشدارییان لە راپرسییەکی ئاژانسی هەواڵی ڕۆیتەرز کردووە، پییان وایە لە مانگی ئابدا پێنوێنی نرخی بەکاربەر بە 2.64% بەرزبووەتەوە،  چاوەڕێ دەکەن هەڵاوسانی ساڵانە دابەزێت بۆ 52.2%. ئەم رێژەیەش زیاترە لەو ئامارە فەرمییانەی حکومەتی تورکیا رایگەیاندووە.

ئەمەش بزانە: بەهۆی گۆرانکارییەکان لە مووچەی بنەرەتی و گۆرانکاری لە نرخەکان، هەڵاوسانی مانگانە بەمشێوەیە گۆرانکاری بەسەردا هاتووە: مانگی یەک (%6.7)، مانگی دوو (%4.53)، مانگی سێ و چوار (%3.2)، مانگی پێنج (%3.37)، مانگی شەش ژێر (%2)، مانگی حەوت (%3.23) و مانگی هەشت (%2.47).

ئەوەی پێشبینی دەكرێت: بانکی ناوەندی تورکیا پێشبینی دەکات هەڵاوسان لە کۆتایی ئەمساڵ دابەزێت بۆ %38 لەسەر بنەمای ساڵانە.