چین ژمارەیەک دەرفەتی خوێندن بۆ خوێندکارانی هەرێمی کوردستان ڕادەگەیێنێت

ئاڤا نیوز

 

 کۆنوسوڵخانەی چین ژمارەیەک دەرفەتی خوێندن بۆ خوێندکارانی هەرێمی کوردستان ڕادەگەیێنێت، کە ساڵانە قوتابیانی کورد بۆ بەدەستهێنانی بڕوانامەی ماستەر و دکتۆرا دەتوانن لە زانکۆکانی ئەو وڵاتە درێژە بە خوێندن بدەن.

 

لێدوانی فەرمی: لیۆ جیۆن، کۆنسۆڵی چین بە ئاڤا نیوزی گوت،"10 ساڵ پێش ئێستا  ئێمە کۆنوسوڵخانەی خۆمان لە هەرێمی کوردستان کردەوە. لەماوەی ئەم 10 ساڵەدا پەیوەندییەکانمان بە شێوەیەکی بەرچاو گەشەسەندنی بەخۆیەوە بینیوە و لە داهاتوودا هەماهەنگی زیاترمان دەبێت.

 

لەلایەکی دیکەوە: د.یاسین ساڵح، بەڕێوەبەری گشتیی نێردراوان و پەیوەندییە ڕۆشنبیرییەکان لە وەزارەتی خوێندنی باڵا و توێژینەوەی زانستیی حکومەتی هەرێمی کوردستان بە ئاڤا نیوزی ڕاگەیاند: تائێستا 45 کەس لە سکۆڵەرشیپی چین سوودمەندبوونە و بەشێکیان خوێندیان تەواو کردووە، بڕیار وایە بۆ ساڵی نوێی خوێندن 12 قوتابی دیکە بۆ ئەم مەبەستە بچنە چین.

 

زانیاریی زیاتر: بە گوتەی کۆنوسوڵی چین،"خولی زمانی کوردی لە زانکۆی بەیجین هەیە و ئەمە واتای ئەوە دەدات کە خەڵکی چین حەز دەکات فێری کوردی ببێت و هاوکار دەبێت لە زیاتر گەشەسەندنی پەیوەندییەکانمان".